Timor Post (11/01/2021)-Bankada Fretilín hanesan bankada governu iha Parlamentu Nasionál husu ba Ministériu Obras Públiku labele taka matan ba kondisaun Estrada Jakarta II iha Munisípiu Ainaru ne’ebé aat ona iha tinan kotuk.
Deputadu Antonino Bianco, hatete estrada Jakarta II hanesan estrada ida tama iha istória Timor-Leste atu hetan nia ukun rasik an, maibé ministru ba-mai hanesan la hare.
“Iha intervensaun dahuluk ne’e ha’u hakarak atu foti kona ba dalan Jakarta II ema boot sira la’o ba mai sempre liu hotu hosi ne’ebá, Jakarta II naran boot iha mundu Timor-Leste tanba ema barak mak mate iha ne’ebá mezmu ke seidauk halo buat ruma iha ne’ebá, maibé dalan ne’e monu kleur ona populasaun hadi’a mesak, hein katak Ministériu Obras Publika bele hadi’a dalan ne’e, pelumenus hadi’a dalan ne’e para ema liu hosi fatin istóriku ne’e bele iha valor duni”, Bianco deklara iha Uma Fukun PN, Segunda (11/01).
Alende Jakarta II Bianco husu MOP atu hadi’a estrada Manleuana ba Aileu Sarlala (bee tatudak) konstrusaun kuaze tinan 7 ona seidauk finaliza.
“Udan hanesan ne’e aumenta kuak halo ema barak mak ho lori karreta ho motor monu iha ne’ebá barak,” dehan Bianco.
Fatin hanesan Deputadu José Pacheco, hatutan atu MOP tau tan ponte iha mota Maloa-Dili ne’ebé hodi ona labarik iha tempu uda.
“Mota Maloa iha tinan kotuk konsege lori ona labarik ida, loloos ne’e iha Radio Timor Kmanek (RTK) ne’e bele tau ona ponte ida atu komunidade iha mota sori-sorin bele halo movimentu livre”, dehan Paicheco.
Nune’e iha Covalima, Deputadu Abel Pires, lamenta inundasaun mosu iha Suku Beco Beko no Debos postu Administrativu Suai Munisípiu Covaima.
“Komunidade iha ne’ebá sempre hasoru inundasaun tanba auto estrada taka mota hosi foho tuun ba tasi, loloos (Governu) bele resolve ona mas to’o agora hanesan (konsidera) la importante maibé sofre kada tinan”, dehan Abel.
Deputadu hosi Bankada Governu ne’e afirma ukun atu servii. Nune’e mós lamenta ho estrada liga Manleuana-Saralala Aileu.
“Ida fali mós estrada ida sa’e ba Sarlala ne’e fó risku barak ba ema nia vida. Uluk ita la’o sa’e hosi Manleuana nian ba to’o iha Sarlala Aileu ne’e la to’o oras ida, maibé han ona tempu oras ida resin tanba estrada sai tiha ona bee dalan” hakotu membru reprezentante povu.
Jornalista: Julio Salinas Soares
Editor: Mariano Martins
1,288 total views, 9 views today
Bele hare Video Seluk :