Timor Post (03/01/2021)—Ekipa sira servisu ba responde moras daet Corona (COVID-19) ne’ebé Ministériu Saúde (MS) estabelese, tula sala ema ida iha kuarentena Tasi Tolu ba izola iha sala izolamentu Vera Kruz, Dili.
Ekipa lolo’os atu tula ema ida ne’ebé identifika ona pozetivu COVID-19 maibé to’o iha kuarentena tula sala fali ema seluk ne’ebé rejultadu teste negativu.
Akontesimentu ne’e iha loron 31/12/2020 iha Kuarentena Tasi Tolu.
Relasiona ho akontesimentu ne’e, Ministra Saúde Odete Maria Freitas Belo, liuhusi konferénsia ba imprensa iha Salaun Palácio das Cinzas, Caicoli, Dili, Sábadu (02/01/2021) rekonese iha duni problema ne’ebé presiza rejolve.
Ministra dehan, iha loron 31/12/2020, Pilár sira Covid-19 nian, ne’ebé dezde inísiu estabelese iha Ministériu Saúde hodi responde ba asuntu Covid-19 iha Timor-Leste, deklara katak akontese lapsu.
Ministra Odete haktuir, antes ne’e laboratóriu nasionál saúde deteta pasajeiru ho naran João Baptista, idade 26, data moris 29 setembru 1994, mak pozitivu COVID-19 iha kuarentena iha Tasi-Tolu, maibé ekipa ba tula fali ema ho naran João Marçal Baptista ho idade 31, loron moris 06 Juñu 1989.
Ministra Odete dehan, iha momentu ba tula ema ne’e, involve mós polísia sira.Tanba ne’e, Governante ne’e dehan, sei halo investigasaun.
“Ita hein katak ita-nia Gabinete Investigasaun Auditória Saúde nian sei hato’o informasaun ba ita atu hatete katak problema ne’e akontese tanba sá,” nia hatutan.
“Ami hakarak atu deklara provizoriamente fallansu ka lapsu ida ne’e akontese tanba husi Ministériu Saúde, maibé iha parte ida ne’ebé? Ida ne’e mak presiza atu halo investigasaun,” Ministra Odete subliña.
Pasiente COVID-19 Sa’e ba 15
Pasiente ba moras daet Corona (COVID-19) sa’e ba 15, hafoin laboratórium deteta tan pasajeirus na’in-2 ne’ebé ho aviaun AirAsia to’o iha Dili iha loron 22/12/2020.
Ho aumentu ne’e, Timor Leste rejista ona kazu komulativu hamutuk ema na’in-46 sura husi Marsu 2020.
Koordenador Pilar VII COVID-19, dr. Nilton do Carmo da Silva, SpOT, Mbiomed, haktuir, pasiente foun na’n-2 ne’e mane hotu, ida ho idade 24, mai husi Portugál iha 20 dezembru 2020 ho TAP Airlines no tránzitu iha Madrid. Iha data hanesan sai husi Madrid ba Doha ho Qatar Airlines no tránzitu iha Doha, iha 21 dezembru viájen husi Doha ba Malázia no toba kalan ida iha ótel sama-sama airport Kuala-Lumpur. Loron 22 dezembru husi Kuala-Lumpur Malázia mai Dili ho AirAsia.
Entretantu ida seluk, ho idade 34, mai husi Londres UK iha 20 dezembru ho Qatar Airlines no tránzitu iha Doha. Iha loron 21 dezembru viájen husi Doha ba tránzitu iha Malázia, iha 22 dezembru husi Malázia mai Dili ho AirAsia.
Iha loron 22 dezembru aviaun AirAsia tuun iha Dili ho pasajeiru hamutuk na’in-100. Pasajeiru hirak ne’e na’in 14 hela iha kuarentena ótel Vila Verde, na’in-8 iha ótel YQ no na’in-78 seluk hela iha kuarentena Otel Regal Apartment, ótel Time Square, ótel Fortuna, ótel Carla Mension.
Sawab foti iha loron 30 dezembru 2020, no rezultadu relata iha 2 janeiru 20201. Status pasajeiru hirak ne’e hotu kategoria close contact tanba iha ona istória kontaktu ho na’in-1 pozetivu detetadu iha Malazia ne’eb’e lakonsege mai Timor-Lete.
Kazu pozetivu na’in-2 ne’e hela iha ótel Vila Verde. Tanba ne’e sidadaun sira ne’ebe konfina iha ótel Vila Verde hahú ohin estende tan kuarentena loron 14.
“Ikusliu nafatin lori ministériu saúde nia naran nomós ekipa covid-19 hakarak hato’o mensajen ba populasaun hotu katak ita sei iha estadu emerjénsia ita presiza kumpri regra sira ne’ebé ministériu saúde fó sai ona atu prevene moras covid-19. Ita hotu-hotu hatene ona katak saúde iha idak-idak nia liman rasik tanba ne’e diakliu ita prevene antes halo tratamentu,” dr. Nilton subliña iha konferénsia ba imprensa ne’ebé hala’o iha loron Domingu (03/01/2021), iha Sentru Integradu Jestaun Krize (SIJK), iha CCD. (cao)
969 total views, 6 views today
Oinsa Ita nia Reaksaun iha Notisia Nee?
You have reacted on “Médiku Sira Tula Sala Ema La hetan Moras COVID-…”
Bele hare Video Seluk :
Subscribe to Timorpost1
/
1928
Autoridade PNTL Enkontru tripartida Urjente ho Embaixada Xina
GOVERNU XINA PROMETE SEI APOIA MOTORIZADA BALUN BA PNTL
BELUN LANSA RELATÓRIU PESKIZA GAM NO GAR
1
/
1928
