Timor Post (29/12/2020)—Governu liuhusi Konsellu Ministru (KM) aprova Projetu Dekretu Governu kona-ba alterasaun dahuluk ba dekretu governu númeru 18/2020 ba medida ezekusaun deklarasaun estadu emerjénsia.
Alterasaun ne’e define fila fali regra sira distansiamentu sosiál nian, ba indivídu hotu-hotu ne’ebé hela iha Timor-Leste obrigatóriu.
Regra sira ne’e mak hanesan, mantein distánsia pelumenus metru ida ba ema seluk, katak la moris ekonomia komún, hela iha uma, bainhira sirkula la’o ain iha dalan públika ka tama iha resintu públiku ka privadu hosi asesu públiku no utilizasaun koletiva.
Labele halibur malu ho ema na’in (10), exetu sira pertense ba sira nia agregadu família, la organiza nein partisipa iha eventu ka selebrasaun sira ne’ebé envolve aglomerasaun liuhosi ema na’in (10), exetu sira pertense ba sira nia agregadu família.
Utiliza máskara ne’ebé taka inus no ibun bainhira la’o iha dalan públiku ka tama hela resintu públiku no utilizasaun koletivu bainhira uza kualkér transporte públiku ba pasajeiru sira.
Ministru Prezidensiál Konsellu Ministru, Fidelis Leite Magalhães iha Palasiu Governu, Tersa (29/12/2020) haktuir, projetu dekretu lei ne’e, aprezenta hosi Primeiru Ministru Interinu, José Maria dos Reis no hetan aprovasaun hosi Konsellu Ministru.
“Ohin Konsellu Ministru Aprova ona projetu dekretu governu nian kona-ba aliterasaun dahuluk ba dekretu governu númeru (18/2020), hosi loron 3 fulan Dezembru, kona-ba ezekusaun deklarasaun estadu emerjénsia ne’ebé efetua hosi dekretu prezidente repúblika númeru 70/2020 hosi loron 3 fulan Dezembru,” Fidelis ba Jornalista sira hafoin reuniaun Konsellu Ministru.
Ministru esplika dekretu ne’e atu nune’e hatán ba agravamentu situasaun sanitaria iha provínsia Timor Osidentál, iha Repúblika Indonézia nian, ne’ebé konta ona ema 1700 hetan kazu pozitivu hosi Covid-19.
Alende ne’e membru executive informa, deskobre tipu foun SARS-CoV-2, ne’ebé sei iha tan kontajioza duke orijinál, tanba aumenta númeru kazu ne’ebé diagnostika iha territóriu nasionál.
Fi’ar Kultura no Reja
Entretantu antes ne’e Observadór polítiku UNTL, Camilo Ximenes, ba jornalista sira iha nia kna’ar fatin-Kaikoli, hatete, governante halimar ho estadu emerjénsia.
“Ita nia Estadu ne’e deklara Estadu Emerjénsia ne’ebé mak hanesan brincadeira, tanba ita boot sira haree, foufoun ita tama Estadu Emerjénsia rigorozu oi-tuan, maibé depois ida ne’e ita deklara Estadu Emerjénsia, ema uza máskara mós laiha, ema halo atividade sira ne’ebé mak lori ema barak tebetebes, kuaze ita la kontrola no iha loza sira nein atu fase liman. Ida ne’e kerdizér-ke Estadu deklara Estadu Emerjénsia, maibé la kontrola rigorozu,” Camilo kestiona.
Razaun ida ne’e maka nia dehan, Governu ne’e deklara Estadu Emerjénsia, maibé hanesan halimar fali, liuliu Governante sira mak la kumpre ho di’ak. Nia kompara, iha Ministru sira nia fatin bee de’it mós la iha, ninia staff sira la uza máskara mós nia nunka tau kestaun. Ida nee kerdizér sira mak hakarak halimar.
Camilo dehan, sorte iha Timor ne’e ema fiar ba kultura no reza makas, mak moras nee dook. Se enkuantu ida ne’e mak la iha, ema barak mak mate ona.
Camilo haktuir asaun fahe máskara derrepente iha misa sira natal kalan, situasaun ida ne’e halo ema hotu hakfodak tanba falta informasaun ne’ebé mak klaru hosi Ministériu Saúde.
“Estadu Emerjénsia ne’e kontinua la’o, maibé Governante sira aproveita EE ne’e hodi halimar fila-fali no hamosu pro-kontra, tanba balun fiar no balu la fi’ar,” Camilo kestiona.
Jornalista: Jaime Pires / Julio Salinas Soares
Editór: Mariano Martins
597 total views, 3 views today
Oinsa Ita nia Reaksaun iha Notisia Nee?
Bele hare Video Seluk :
1
/
1886
MISSA PASKOA KINTA-FEIRA SANTA IHA KAPELA MARIA AUXILIADORA FOMENTO I
MISSA PASKOA KINTA-FEIRA SANTA IHA KAPELA MARIA AUXILIADORA FOMENTO I
PNTL Selebra nia Aniversariu ba Dala 24 iha Resintu Kuartel UEP
1
/
1886