(Reportajen Korespondente Manufahi, Luis Casimiro/Editor Mateus da Cruz)
MANUFAHI—Kazu omisídiu ne’ebé komete hosi suspeitu EA, hodi halakon vítima Manuel Pereira nia vida, iha hela faze investigasaun, daudaun ne’e suspeitu detein hela iha Sela Komandu PNTL, Munisipiu Ainaro, molok aprezenta ba Ministeriu Publiku hodi tuir prosesu julgamentu iha Tribunal.
Vítima Manuel Pereira (34), oho hosi suspeitu EA iha area Lebugua, aldeia Tukaro, Suku Nunumoge, Postu Administrative Hatubuiliku, munisípiu Ainaru, maizumenus tuku 11 oras Timor Leste.
Komandante Polísia Munisípiu Ainaru, Superintendente Justinho Menezes ba Timor Post, Via telefone, informa, tuir informasaun hosi família vítima katak vítima ba iha ninia tian nia uma, no nia tian fó kafé ba hemu hela no hemu hotu vítima ba haris fatin ba soe bee, suspeitu iha li’ur hein ho katana ona entaun vítima halai sai hosi haris fatin, no akontese duni malu entre sira na’in rua.
“Iha haris fatin suspeitu ho idade tinan 57 ho vítima komesa duni malu to’o ba rai lolon maizumenus kilómetru ida, iha duni malu ne’e suspeitu konsege oho vítima ho maneira lori katana taa iha vítima nia ulun kuak tolu no taa iha ain tuur parte loos kuak boot ida taa iha liman karuk ho loos kotu tiha no kua kotu vítima nia kakorok,” nia dehan.
Hafoin oho vítima, suspeitu lori vítima nia ulun ba tara iha Ai-Kakeu leten no suspeitu fila ba nia uma hodi dehan ba nia fen kaben katak, “ha’u oho tiha ona Manuel, tanba ne’e ha’u ba entrega-an ona ba polisia,”.
Kona-ba motivu suspeitu oho vítima, komandante dehan, tuir informasaun kazu omesídiu ne’e iha ligasaun ho problema pasadu entre matebian no suspeitu, maibé nia parte seidauk hatene rezultadu loloos tanba sei iha hela investigasaun nia laran.
Oras ne’e daudaun suspeitu detein hela iha sela Polisia Munisípiu Ainaru. Enkuantu mate isin, ambulánsia funeráriu lori ona ba mortuáriu Hospital Nasionál Guido Valadares hodi halo autópsia.(Lee notisia seluk iha jornal Timor Post/asesu youtube Timor Post)
1,369 total views, 3 views today
Bele hare Video Seluk :