(Reportajen Korespondente Manufahi, Luis Casimiro/Editor Mateus da Cruz)
MANUFAHI—Hamutuk feto no labarik na’in 32 iha Manufahi, sofre violénsia tipu tolu no daudaun ne’e Fundasaun Luta Ba Futuru (FLBF) asegura hela vitima sira iha uma mahon paz hodi rekupera hosi trauma.
“Hahú hosi 2018 to’o 2022 Fundasaun Luta Ba Futuru (FLBF) harii uma mahon rejista ona kazu ne’ebé akontese ba feto no labarik feto hamutuk 32,”dehan, Koordenadora Uma Pas, Munisipiu Manufahi, Paulina da Costa Fernandes, ba jornalista iha Sede Suku Babulo, Same, Kinta (10/03).
Nia hatete, kazu tipu tolu ne’ebé akontese ba vítima sira kompostu hosi violensia domestika, violensia sexual no kazu abandona.
Entre kazu hirak ne’e balun prosesu to’o ona iha tribunal, balun hetan ona akuzasaun hosi Ministériu Públiku no balun dada fila fali sira nia kazu bainhira iha ona polísia. Hosi prosesu ne’ebé la’o ona arguidu na’in rua maka kumpre ona pena prizaun.
Hosi kazu tolu ne’e rejista violénsia doméstika iha sanulu resin rua, violénsia seksuál sanulu resin haat no kazu abandona iha haat.
Uma Mahon Paz durante ne’e hasoru problema bainhira atende vítima sira no sira tenta beibeik husu apoiu ba Caritas Austrália Timor Leste (CATL) inklui Ministériu Solidaridade Sosial no Inkluzaun (MSSI) maibé to’o oras seidauk iha resposta.
“Problema ne’ebé ami enfrenta mak laiha transporte karreta hodi halo atendementu emerjénsia ba vítima sira ne’ebé dook hosi postu Alas, Turiskai, Fatuberliu no suku balun iha postu Same vila, “nia aprezenta.(Lee notisia seluk iha jornal Timor Post/asesu youtube Timor Post)
747 total views, 3 views today
Bele hare Video Seluk :