ADVERTISEMENT

Xanana Presta Omenajen ba FALINTIL no Haruka Forsa Sira Entrega Apoiu Nesesidade Báziku ba Kbiit Laek iha Oekusi

Timor Post - Raeoa
  • Share

Timor Post (20/08/2020)—Eis Komandante Ein Xefe Kayrala Xanana Gusmão, hamutuk ho komunidade sira iha Suku Malelat, Sub-Rejiaun Pásabe, Rejiaun Administrativa Espesiál Oekusi Ambeno (RAEOA) presta omenajen ba offisiál no militar sira hotu ne’ebé hala’o kna’ar iha rejiaun ne’e.

“Ohin, loron boot 20 de agostu. FALINTIL-FDTL nia militar sira hamriik dadauk iha ita nia oin, ita presta omenajen ba sira ho meius simples nu’udar ita nia lutu nasaun. Ita nia apresu nu’udar povu ne’ebé simples teb-tebes ba ofisiais no militar sira ne’ebé servisu iha Oekusi, ita nia basa liman ba sira,” Xanana subliña iha komunidade no militar sira ne’ebé akompaña mós Misaun COVID ne’ebé Líder Nasionál ne’e inisia durante fulan hirak ikus ne’e.

Xanana husu ba militar sira atu kontinua hala’o servisu ho profesionál iha liña fronteira hodi nune’e garante paz no hakmatek iha komunidade sira nia leet.

“Husu boot servisu di’ak hodi serví nafatin povu ida ne’e,” Xanana subliña.

Hafoin presta omenajen, Xanana bolu hikas militar sira ba entrega apoiu nesesidade ba komunidade kbiit laek sira iha Suku Malelat.

FALINTIL, antes ne’e Xanana afirma, durante tinan 24 funu kontra inimigu iha duni forsa armada (FALINTIL) maibé to’o duni inimigu sai husi territóriu la’ós ho kilat.

“Ha’u la nega FALINTIL. Agora barak, balun la hatene kaer kilat, rona kilat tarutu sira halai, maibé (ferik-katuas) sira tú mak ita duni inimigu. Ne’e laiha ema ida bele nega. Ita la duni inimigu ho kilat be sira halai, ita duni tutuir. Hau mós la nega ema boboot sira husi movimentu boboot sira ne’e, mas ha’u husu de’it ema ida labele nega katak sira ne’e (ferik-katuas/povu) la tú inimigu la sai,” Xanana afirma kestaun ne’e bainhira halo diálogu ho komunidade sira iha Oekusi, Kuarta (19/08/2020).

Tanba ne’e, Xanana dehan, sei organiza movimentu síviku ida para aprejenta ba estadu hodi tau matan.

“Ha’u la dehan katuas ferik sira ne’e mak dirize funu. Ha’u dehan katak sé ita nia inu nasionál rasik dehan “Gloria o povo”, katak, povu ida ne’e maka reprejenta tinan rua-nulu-resin-haat,” Xanana subliña.

Tanba, Xanana hatutan, iha momentu ne’eba (referendum) joven barak mak tinan sei kiik la vota, maibé terus durante tinan barak nia laran ferik-katuas sira balun mate ona no agora dadauk forsa laiha ona.

Durante diálogu ho komunidade sira iha Oekusi, Xanana orienta ona autoridade lokal sira atu rekolla dadus ferik-katuas sira atu entrega ba estadu bele tau atensaun.

Fó hanoin fali katak, iha tinan 1999, iha loron 30 Agostu, liuhusi referendum, timoroan sira maioria hili rejeita integrasaun ba Indonézia ho votus 78.50%. Nune’e, hafoin Organizasaun Nasoins Unidas (ONU) fó sai rejultadu referendum iha loron 04 Agostu, obriga sidadaun Indonézia ho forsa sira fila ba sira nia rai.

Entretantu Iha loron 20 fulan-agostu 2020, Timor Leste komemora aniversáriu FALINTIL ba-dala-45.

Loron ne’e nu’udar loron espesial ba Kombatente Libertasaun Nasionál sira ne’ebé estadu konsidera ho aten-barani no sakrifísiu, durante luta iha tinan 24 nia laran, lori Timor-Leste sai livre no independente. (cao)

 681 total views,  3 views today

Oinsa Ita nia Reaksaun iha Notisia Nee?
Like
Love
Haha
Wow
Sad
Angry
You have reacted on “Xanana Presta Omenajen ba FALINTIL no Haruka Fo…” A few seconds ago

Lee Mós :
Xanana Abertura Konsolidasaun Partidu CNRT Nível Rejionál iha Oe-kusse

Bele hare Video Seluk :
  • Share
ADVERTISEMENT
SCROLL FILA BA NOTISIA

Notisia Timorpost Seluk


Komentariu :
Timorpost.com. Respeita tebes Ita Nia opiniaun. Laran luak no uza etika bainhira hatoo opiniaun. Opiniaun iha Ita Nia responsabilidsde, tuir lei ITE.

Varanda
Kategoria
Video
Buka
Watch
Facebook
error:
Simu Notifikasaun Hosi Timor Post Online! OK No