OEKUSI–Autoridade iha Rejiaun Administrativa Espesiál Oé-cusse Ambeno (RAEOA), iha tempu badak nia laran sei lansa projetu estrada diresaun Tono ba to’o Oesilo, suku Bobometu, Sub-rejiaun Oesilo.
Prezidente Autoridade Rejiaun Administrativa Espesiál Oé-cusse Ambeno (RAEOA), Arsénio Paixão Bano, hatete, agora daudaun lansa ona tenderizasaun ba estrada hahú husi Tono ba to’o Oesilo.
“Tenderizasaun ba estrada diresaun Tono ba Oesilo daudaun ne’e la’o hela, entaun semana rua tan ita rona ona rezultadu kompañia ne’ebé sei sai manan na’in ba projetu ne’e no ita sei halo lansamentu ba estrada refere,” prezidente Arsénio Bano hateten iha ámbitu konferénsia CCI-RAEOA ne’ebé hala’o iha Otél Oe-upun, Oekusi, Kinta (23/02).
Prezidente autoridade RAEOA ne’e afirma liután katak, estrada ne’ebé mak hahú husi postu administrativu Pante Makasar ba to’o postu administrativu Oesilo ne’e kategoria ba estrada nasionál nian.
“Ha’u hakarak husu ba tékniku sira atu dezeñu ba estrada nasionál to’o ba Oesilo, labele hanesan ho estrada sira iha Indonézia, tanba Oekusi Espesiál. Ne’ebé estrada sira tenke úniku uitoan,” Arsénio hatutan.
Antes ne’e, iha loron 20 Agostu 2022, Prezidente autoridade RAEOA, Arsenio Paixão Bano, hatete, prosesu reabilitasaun no melloramentu ba projetu estrada nasionál hosi Pante Makasar ba Oesilo prosesa ona rejime jurídiku aprovizionamentu.
“Iha fulan ida ita sei hahú projetu estrada nasionál hosi Tono ba Oesilo, daudaun iha hela prosesu aprovizionamentu. Ita Oekusi tenke orgullu, maibé tenke servisu maka’as hodi dudu dezenvolvimentu la’o”, Arsénio hateten iha loron Sábadu (20/08/2022).
Entretantu, diretór rejionál infraestrutura RAEOA, Cândido dos Reis Amaral, hatete, autoridade RAEOA lansa ona konkursu ba konstrusaun estrada Tono ba Oesilo iha semana kotuk.
“Ita hein iha tempu badak interesadu empreza sira bele tuir rekizitu sira ne’ebé ita tau no ita mós konfirma empreza internasionál sira tanba ne’e relasiona ho kapasidade, entaun iha tempu badak sira mai foti ona dokumentu, la kleur tan sira halo submisaun ita bele hatene ona empreza manan na’in ba projetu ne’e”, nia hateten.
Enkuantu, distánsia ba projetu nasionál hosi Tono ba Oesilo ne’e hamutuk kilómetru 18, ne’ebé sei hahú hosi eis merkadu Tono, suku Bobokase no suku Naimeko mak ba suku Bobometo su-rejiaun Oesilo.
2,862 total views, 6 views today
Bele hare Video Seluk :
Subscribe to Timorpost
