RAEOA (timorpost.com) – Relasiona ho akontesimentu udan boot, iha Rejiaun Administrativa Espesiál Oe-kusi Ambenu, hamosu inundasaun, tanba implika hosi barajen Tono ne’ebé kloot.
Xefe Suku Naimeko, Marcos Liu, hatete udan dezde Kinta kalan (29/13), tuku 05:00 madrugada, to’o Sesta mak mosu inundasaun.
“Durante ami haree barajen ne’e mak kloot, kuandu mota boot sempre bee fo’er nalihun, nune’e mós mota tuun la forsa, tanba barajen ne’e mós tetuk,” nia informa ba Timor Post liuhosi telefone, iha Sesta kalan (30/12).
Loloos ne’e inundasaun la mosu, maibé udan been makaas bee mota tuun mai ladun forsa, tanba barajen Tono kloot no tetuk. Ne’ebé bee ladun forsa konsekuensia bee fo’er nalihun ba komunidade sira-nia hela fatin.
Kada tinan kuandu udan boot mak mota tuun, sempre implika ka mosu inundasaun. Mosu inundasaun ho razaun barajen Tono kloot, bainhira ai ruma ka fo’er taka barajen, hakarak ka lakohi bee fo’er tenke nalihun ba komunidade sira-nia uma.
Komunidade kada tinan sofre bee fo’er, kompostu hosi komunidade sira iha área Baqui, Maumate, Nunuheno no Nusla’o, lokaliza iha sub-rejiaun Pante-Makasar.
Akontesimentu udan boot ne’e komunidade iha área Baqui, kuaze uma-kain 20 mak hetan sofre hosi inundasaun.
Área Nusla’o nian kuaze uma-kain liu 15 mak sofre bee fo’er. Iha Nunuheno to’o agora seidauk hatene loloos família hira mak hetan estragu.
Alende kona-ba área Maumate nian, kuaze uma-kain 20 mak hetan estragu hosi inundasaun. Nune’e mós negosiante kioske sira lalin hotu sira-nia sasán.
Komunidade hirak ne’e, sira-nia sasán iha uma laran kuaze lakon hotu, tanba bee fo’er mak lori. Ema balun ohin evakua kedas ba bairru Hau-ana.
Autoridade ne’e relata tan katak, akontese udan boot bee mota mós boot, konsege lori komunidade sira-nia animal (karau) hamutuk lima.
Inundasaun ne’e laiha ema ruma mak atu lakon ninia vida, maibé inan faluk ida ninia uma mak monu iha estrada kruzamentu Laku-fo’an nian.
Inundasaun ne’e mosu la’os estraga de’it komunidade sira ninia rezidénsia, maibé estraga mós ho agrikultor sira-nia natar hektare tolu iha suku Naimeko nian.
Alende komunidade sira iha suku Kunha no Nunuheno la hatene família hira mak sofre inundasaun.
To’o agora hosi autoridade rejionál ladauk vizita vítima inundasaun. Maibé orienta ka haruka de’it eskavator ida atu suru mota ninin iha área Nusla’o nian.
Nia hatete, FALINTIL Forsa Defeza Timor-Leste (F-FDTL), Bombeiru no Seguransa Sívil, mak ohin haree ona vítima inundasaun sira-nia hela fatin.
Tuir observasaun Timor Post nian, ne’ebé haree direita iha publikasaun liuhosi média sosiál (Facebock), komunidade maioria lalin hotu sira-nia sasán uma laran, atu buka fatin dignu.
Relasiona ho inundasaun ne’e, Timor Post seidauk konfirma dadus loloos, iha autoridade rejional, Rejiaun Administrativa Espesiál Oekusi Ambenu (RAEOA).
2,094 total views, 3 views today
Bele hare Video Seluk :
Subscribe to Timorpost
