RAEOA (Timor Post)–Konsellu Nasionál Juventude Timor-Leste, (CNJTL), Sub-rejiaun Pásabe, Rejiaun Administrativu Espesiál Oe-kuse Ambenu (RAEOA), lamenta ho sistema implementasaun Bolsa da Mãe ba Jerasaun Foun (BMJF), ne’ebé la hanesan ho sosializasaun, tanba ko’a kliente nia osan no pagamentu la uza fasilidade Governu, maibé uza kompañia nia uma hodi selu ba kliente.
Prezidente CNJTL Pásabe, Mateus Punef Teme, hatene CNJTL postu Pásabe nia preokupasaun kona-ba programa BMJF iha postu ne’e, hahú momentu rejistu iha saúde, benefisiáriu hetan kaderneta manual ida, husi saúde nian katak, kada benefisiáriu ne’e hetan dolar amerikanu ruanulu (20 USD), ne’e ba labarik ne’ebé mak moris tiha ona, depois inan isin rua, kada labarik ida simu dolar amerikanu sanulu resin lima (15 USD).
“Agora to’o implementasaun la’ós simu 20 USD ou 15USD, mais sei ko’a tan dolar amerikanu ida, hitunulu sentavu (1,70 USD), sistema ne’e husi Telemor, halo fali hanesan mosan nian. Ko’a 1.70 USD ne’e, entaun sira simu la to’o 20 USD maibé sira simu dolar amerikanu sanulu resin ualu, tolunulu sentavus (18,30 USD) ne’e ita la konsege sosa buat ida, depois pior liu tan mak dolar amerikanu 15 USD ne’e, kuandu ko’a dolar amerikanu 1,70 sentavus, hela de’it dolar amerikanu 13,30 sentavus la to’o foos saku ida,” Prezidente CNJTL Pásabe, Punef Teme, dehan ba Online Timor Post, via Telemovel, Kuarta (10/08).
Prezidente CNJTL lori benefisiáriu sira nia naran, husu ba Ministériu rua mak hanesan, Ministériu Sosiál no Ministériu Saúde, atu toma atensaun ba kestaun hirak ne’e, tanba ida ne’e importante ba povu.
“Kuandu Estadu ou Governu hakarak ajuda duni, labele fó ho liman sorin, no liman sorin taka. Depois ne’e programa Governu nian, tenke simu osan Governu nian, la’ós benefisiáriu simu fali osan Telemor ou Telkomsel nian, karik sira iha planu ruma, atu buka kompañia ida hodi selu ba kliente sira ou benefisiáriu sira, ne’e estadu mak tenke selu, la’ós ko’a fali benefisiáriu sira-nia osan, nune’e, karik simu osan husi programa BMJF ne’e, iha fasilidade Estadu nian, hanesan Xefe Aldeia ou Sede Suku. Maibé benefisiáriu sira ba simu direta de’it iha mosan ou kompañia nian, ida ne’e presiza Governu toma atensaun”, nia relata.
Tanba ne’e mak lideransa lokál, horisehik mós sira sente la satisfás ho mekanizmu implementasaun pagamentu ne’e, tanba osan estadu nian, nune’e presiza mós uza fasilidade estadu nian, la’ós uza fali uma privadu hodi selu benefisiáriu sira ne’e.
Nia hatutan, depois pontu fokal husi Ministériu Sosiál no Ministériu Saúde nian, nunka ema ida atu partisipa iha pagamentu refere.
Tuir Prezidente CNJTL nia haree no hatene, ekipa husi ne’e Telemor ho Telkomsel de’it.
Nia afirma, pagamentu ne’e iha Postu Pásabe, suku Malelat ho Abani, iha loron (06/08), hahú pagamentu ona, modelu pagamentu ne’e hanesan de’it, ko’a hotu, husi Malelat mós ko’a no mai to’o Abani mós ko’a.
“Alende ne’e mós horisehik pagamentu la’o daudauk, benefisiáriu sira mós halerik hanesan ne’e, koitadu ami-nia osan ko’a tan hela de’it dolar amerikanu 18,30 sentavus, balu dehan, ha’u nian 15 ko’a tan 1,70 sentavus, hela de’it dolar amerikanu 13,30 sentavus, atu sosa foos saku ida mós osan la to’o,” nia hakotu.
2,283 total views, 3 views today
Bele hare Video Seluk :
Subscribe to Timorpost
