(Reportajen Luis Casmeiro/Editor Mateus da Cruz)
MANUFAHI— Serimónia Ritual loke bee inan ne’ebé hala’o iha Aldeia Uma Feric, Suku Uma Bereloic, Postu Administrativu Alas, Munisípiu Manufahi, ohin, rezulta joven ida kanek iha parte liman tanba hetan tata hosi Lafaek.
Xefe Suku Uma Bereloik, Postu Administrativu Alas, Munisípiu Manufahi, Bernardo Fernandes das Flores, informa, loos duni iha nia populasaun ida ho naran Bernardo da Costa idade 25, kaben na’in oan rua, hetan tata hosi lafaek bainhira partisipa hela serimónia ritual.
“Maski akontesementu ne’e ha’u laiha ne’ebá maibé rona informasaun katak lia na’in sira halo serimónia ritual atu loke bee inan hodi kaer ikan,” dehan Bernardo ba Timor post, Sabadu (30/04).
Nia hatutan, antes lafaek tata vítima, katuas lia na’in sira hakat ba bee inan ninian ninin bolu Donato hakat tama ba bee laran tidin ai atu hodi kesi tali maibé bainhira nia sama ain iha bee ninin Lafaek mós dada nia ain.
“Sorte vítima lori liman baku iha lafaek nia inus nune’e lafaek konsege husik nia, selae vítima lafaek dada tama tiha bee laran,” nia dehan.
Tuir Xefe Suku, serimónia ritual ne’e komunidade sira sempre halo kada tinan tolu ho objetivu atu hasai bee inan nune’e bele kaer ikan ho na’an sira seluk iha laran.
Entertantu, vítima rasik sofre kanek iha nia liman loos no daudaun ne’e halo hela tratamentu ho ai-moruk tradisionál, iha nia rezidénsia.
1,610 total views, 3 views today
Bele hare Video Seluk :