DILI (timorpost.com) — Atu responde ba preokupasaun Komunidade iha Munisípiu Manatutu, kona-ba natar lubuk abandonadu tanba afeta hosi mota Laklo, Governu liuhosi Institutu Jestaun Ekipamentu (IGE), promete sei normaliza iha tempu badak.
Prezidente Inspetór Jerál Estadu (IGE), Ermenegilda da Costa Laurentina, hatete iha Palásiu Prezidensiál, Bairru-Pité, katak iha tempu badak IGE sei kontinua normaliza Mota Laklo nian.
“Iha tan ajenda balu ne’ebé ohin diskusaun ho Prezidente Repúblika, katak iha tempu badak husi parte IGE nian sei kontinua normaliza mota Laklo ne’ebé ita-nia komunidade sira afeta iha loron 04 fulan Abríl tinan 2021 liu bá,” nia hateten hafoin hasoru malu ho Xefe Estadu.
Nia dehan, sira hanoin ona katak, iha tempu badak sei kontinua serbisu fila fali iha mota nian. Nune’e depois fila husi ne’e sei orienta ekipa para aban bele kontinua halo serbisu iha mota Laklo.
Nia subliña, tanba ho kondisaun ne’ebé iha katak, iha parte IGE nian mákina pezadu iha de’it 127 unidade, iha 93 unidade maka iha kondisaun di’ak, iha 17 unidade mak iha hela manutensaun no mós iha 23 unidade mak hanesan kondisaun aat totál.
“Entaun ho 23 unidade ne’e, ami fahe ba kada Munisípiu hotu-hotu ho kondisaun ida ne’e mak iha parte balu ou pedidu balu husi komunidade sira ami seidauk bele finaliza,” nia informa.
Nia hatete, iha parte balu IGE finaliza ona, maibé husi parte IGE nian kompremetidu sei kontinua responde komunidade sira preokupasaun tuir pedidu sira ne’ebé iha.
“Nune’e agora udan monu rai ona, ami hanoin katak, agora ita haree liubá Emerjénsia sira ne’ebé afeta ba ita-nia komunidade sira, IGE mantein apoiu ita-nia komunidade sira,” nia hakotu.
2,954 total views, 3 views today
Bele hare Video Seluk :