DILI (timorpost.com) – Timor-Leste ukun aan tinan 20 Resin, Komunidade iha suku Lisadila, Postu Administrativu Maubara, Munisípiu Likisa, agrikultór sira susar lori produtu lokál ba Merkadu.
“Kona-ba suku Lisadila, ita hatene area rurál, tinan-tinan hasoru problema mak estrada, durante tinan ruanulu ona ami nunka lori produtu lokál ba Merkadu”, dehan Xefe Suku Lisadila, Fernando Lobo, ba Timor Post Online via-telefone, Tersa (03/01).
Autoridade lokál ne’e afirma, durante hato’o pedidu ba Governu liuliu Ministériu Obras Públiku, Parlamentu Nasionál liuhosi Komisaun E no D, maibé to’o agora seidauk hola desizaun ba problema refere.
Alende ne’e nia dehan, problema bee moos ladún sai preokupasaun tanba udan tun Komunidade bele asesu ona, maibé problema boot mak estrada ne’e, tanba estrada aat liuhusi Ponte Loes ultrapasa suku hitu foin to’o suku Lisadila.
Nia afirma tan katak, durante hato’o pedidu ba Governu liuliu Institutu Gestaun Ekipamentu (IGE) no Ministériu Obras Públiku (MOP), tun direta haree kondisaun estrada maibé seidauk hadi’a to’o agora.
“Ita bele dehan estrada estragus total tanba mota halai tuir estrada de’it”, katak nia.
Autoridade lokál ne’e konta, tempu Indonézia estrada uza alkatraun, iha 2002 kondisaun estrada aat, difikulta tebes komunidade sira atu lori produtu lokál ba merkadu.
Nia dehan, kada tinan Governu aprova orsamentu tokon ba tokon, maibé ladauk hetan Governu lori mákina ka fakar rai hodi hadi’a netik kondisaun estrada liuliu area rurál sira.
Enkuantu suku Lisadila iha aldeia hitu mak hanesan, Bautalo, Kai-Cassa, Darulema, Glai, Lebuhae, Manuquibia, Nunu Lisa. Total xefe família hamutuk 856 no popupulasaun 3.800.
Entretantu Postu Administrativu Maubara iha suku hitu mak hanesan, Vatuboro, Gugleur, Guiso, Lisadila, Maubaralissa, Vatuvou, Vaviquinai.
1,380 total views, 3 views today
Bele hare Video Seluk :
Subscribe to Timorpost
