Lautém (timorpost.com) – Komunidade preokupa estrada husi diresaun Lautém ba Com kotu difikulta movimentasaun públiku nian.
Estudante ida husi Universidade Nasionál Timor Loronsa’e (UNTL), Amadeu Gouveia, hatete estrada ne’e kotu tanba hetan estragu husi udan bo’ot.
“Ha’u hanesan komunidade ejize ba Governu atu halo reabilitasaun ba estrada refere, tanba estrada ne’e rasik fó impaktu ba ami atu halo viajen ba no mai,” nia hateten ba Timor Post Online, iha Lautém, Kuarta (21/12).
Nia dehan, estrada ne’e hetan estragu tanba udan bo’ot, no la’ós foi mak hetan estragu, maibé kuaze fulan lima ona, seidauk iha Ministériu ka Kompañia balun ne’ebé atu mai haree no hadi’a.
“Area husi Lautém ba Com, komunidade barak mak liuhusi ne’e, tanba estrada di’ak uitoan, no liuhusi leren estrada kuaze kilometru sanulu (10) a’at, no to’o Lopalos kota, maibé hetan fali estrada kotu, pasensia komunidade tenke lalin sira-nia sasán mai estrada sorin mak tula ba kareta ou motor,” nia esplika.
Nia hatete, hanesan sidadaun fiar katak projetu hirak ne’ebé Governu halo, ne’e ba planu dezenvolvimentu nasaun nian, maibé daudaun ne’e estrada husi área hot-hotu liuliu Vikeke nian, ponte barak mak hetan estagu, entaun ne’e kompeténsia Governu nian, atu aselera programa ba estrada sira.
“Estrada ida ne’e ami ejize ona ba lider munisípiu liuliu Administradór, maibé ho razaun ida katak aprovasaun orsamentu husi Governu sentral seidauk, tanba ne’e ita hein,” nia esperansa.
Tanba ne’e, nia husu nafatin ba Governu presiza halo reabilitasaun ba estrada ne’ebé hetan estagu husi udan bo’ot.
Tuir observasaun Timor Post, asesu estrada husi Lautém ba area Com nian, aat duni, no hetan ameasa bo’ot husi laloran tasi, no mós bainhira udan bo’ot, no estada refere kotu no implika komunidade sira atu halo movimentasaun.
Komunidade lori sasán ba Merkadu Lospalos, no Lautém, sempre mai tu’un iha estada aat nian, no hakur liu ba sorin mak foin asesu fali kareta ou motor.
2,092 total views, 3 views today
Bele hare Video Seluk :
Subscribe to Timorpost
