DILI—Eis Komandante Ein Xefe Forsa Armada Libertasaun Nasional Timor Leste (FALINTIL), Kayrala Xanana Gusmão halo vizita hikas ba nia subar fali iha ponta leste, Bauro – Postu Administrativu Lospalos, Munisípiu Lautem.
To’o iha raikuak ida ne’ebé nia subar ba, Xanana mataben monu tanba hanoin hikas iha momentu ne’eba nia sente iha situasaun difisil tebes maibe nia augenta de’it iha raikuak ne’e ho kondisaun moras.
Ema ne’ebé subar nia ho naran Saudoza Jacinta de Jesus maka fó hahan ba nia. Nune’e nia konsidera Saudoza Jacinta hanesan nia inan ne’ebé nia jura iha nia moris la haluha sakrifísiu hotu ne’ebé Saudoza Jacinta halo ba nia hodi hodi hetan fali forsa ba kontinua luta ba libertasaun nasionál.
Xanana vizita fatin istóriku ne’ebé to’o agora sei orizen ne’e, hafoin nia ba kari uluk aifunan ba nia inan Saudoza Jacinta.
Saudoza Jacinta hakotu iis iha loron 24/01/2020. Xanana iha momentu triste ida ne’e la marka prezensa tanba preokupa hela ho nia servisu luta ba kompleta soberania liuliu halo preparasaun ba halo diálogu ho estadu Repúblika Indonézia hodi hakotu fronteira rai entre nasaun rua ne’e.
Nune’e, família sira hein duni prezensa Xanana nian maibé ikus mai deside ba haloot. Nune’e Xanana marka hikas ajenda hodi ba kari aifunan no ba vizita hikas fatin ne’e Saudoza Jacinta subar Xanana ba.
Iha aifunan ne’ebé Xanana lori ho hakerek iha lian Fataluku katak “Mãe Jacinta: Mãe mak salava ha’u baihira ha’u moras, iha tempu ne’eba ha’u infrenta situasaun ida ke defisil tebes,”.
Ho vizita ida ne’e, Kayrala Xanana Gusmão la partisipa iha diálogu ne’ebé hala’o entre líder istóriku no pesonalidade sira ne’ebé lidera husi Prezidente Repúblika Francisco Guterres Lú Olo, ne’ebé hala’o Segunda (10/02/2020), iha Palásiu Nobre, Lahane, Dili.
Antes ne’e Lú Olo marka ona ajenda halo diálogu ho líder istóriku no personalidade sira hamutuk na’in neen, inklui Marí Bim Amude Alkatiri, José Manuel Ramos Horta, Taur Matan Ruak, Lere Anan Timur, Roque Rodrigues no Kay Rala Xanana Gusmão rasik. (cao)
1,199 total views, 3 views today
Bele hare Video Seluk :
Subscribe to Timorpost
