DILI-Eis Prezidente Republika no Primeiru Ministru hanesan mos lider nasional Kayrala Xanana Gusmao, Sabadu (14/03/2020) tun ba estrada hamoos foer impaktu husi udan kuaze oras rua iha Dili iha loron Sexta (13/03/2020).
Udan boot iha loron ne’e iha Dili marka volume boot liu iha tinan 2020.
Mota boot lima ne’e simu udan ben maka’as husi foho sira haleu Dili, konsege sobu komunidade sira nia uma, edefisiu publiku sirs liuliu Palasiu Prezidensial Nicolau Lobato, Bairro-pite, Dili.
Kauza ida boot husi udan ben no mota halai la tuir nia dalan tanba dranajen iha Dili laran kloot liu, liuliu iha ponte Bekusi ne’ebe kloot halo foer intupidu no mota tenke nakfakar sai husi ponte leten no sasorut komunidade sira nia uma.
Iha Bekusi, konsege hamate joven ida mate tanba mota tun joven nee halai la biban. No iha loron nee duni rejista ema na’in haat mak lakon. Maibe too notisia nee hatun Timor Post seidauk hetan konfirmasaun husi autoridade kompetente kona-ba buka tuir ema ne’ebe lakon.
PRIMEIRU-MINISTRU TAUR MATAN RUAK ORIENTA MOP NO SEPS EVAKUA VÍTIMAS INUNDASAUN
Entretantu tuir dadus husi palasiu governu, kauza husi udan boot nee hamosu inundasaun forte kuaze iha Kapital Dili parte Sentru no Leste nian. Área sira ne’ebé afetadu makas mak hanesan; Bekora, Bekusi, Bidau, Bemori, Kaikoli, Maloa no Prezidénsia Repúblika.
Hosi dezastre naturais ne’e, mota lori ema na’in 5, na’in 2 mak mate, no 3 konsege salva no lori halai ba Ospital HNGV.
Haree ba situasaun ne’e, Primeiru- Ministru Taur Matan Ruak, orienta kedas Ministru Obras Públika (MOP) no Sekretáriu Estadu Protesaun Sivíl(SEPS) hodi tun direta ba terenu hodi halo evakuasaun emerjensia ba vítima sira ne’ebé afetadu maka’as.
Vítima sira hamutuk na’in 194 mak hodi kalan evakua kedas ba fatin evakuasaun tolu ne’ebé SEPS prepara mak hanesan; Igreja Bidau Mota Klaran akumula nain 72, Sentru Operasaun Desastre iha Bemori, nain 80 no iha Sekretária Estadu Protesaunn Sivíl nia fatin, nain 42.
Enkuantu Minitru Obras Públika mós hodi kalan tun direita ba observa fatin sira ne’ebé estragus maka’as hodi orienta IGE atu halo normalizasaun lalais ba fatin sira ne’e, nune’e movimentasaun bele la’o normal fila flai. (cao)
626 total views, 3 views today
Bele hare Video Seluk :
Subscribe to Timorpost
