Dili (Timor Post)– Ajénsia Estadus Unidus Amérika ba Dezenvolvimentu Internasionál (USAID) hamutuk ho Organizasaun Noun-Governamentál (ONG), ualu halo lansamentu sira nia rezultadu estudu peskiza tinan 2022 nian, hanesan parte ida husi USAID-Timor-Leste nia atividade Advokasia ba governasaun di’ak hodi halibur evidénsia ba apoia polítika advokasia iha sira nia área.
ONG ualu ne’ebé USAID apoia mak, Asosiasaun Defisiénsia Timor-Leste (ADTL), Belun, Community Based Rehabilitation Network Timor-Leste (CBRNTL), Fundasaun Hafoun Timor-Leste (FHTL), Programa Monitorizasaun ba Sistema Judisiáriu (JSMP), Many Hands One Nation (MAHON), Mata Dalan Institute (MDI), Programa Espesífiku fó Prioridade ba Ema Kiak (PROSPEK).
Diretora Misaun USAID, Zema Semunegus, hatete, husi sira nia rezultadu peskiza ne’ebe mak ohin fahe espera atu hametin sira nia parseria iha prosesu elaborasaun polítika no fornese vizibilidade ne’ebé boot liu ba nesesidade no prioridade sidadaun sira nian ne’ebé sira reprezenta.
“Ha’u kontente tebes ba lansamentu Research products, ne’ebé ami nia parseiru ONG na’in-8 halo, husi peskiza ida ne’e, hola parte iha atividade USAID nian ba ONG advokasia Governasaun di’ak, atividade ninia durasaun ba tinan 5, komesa husi fulan Agostu 2020 to’o fulan Agostu 2025, ho nia total orsamentu hamutuk dolar amerikanu 9.5 millaun USD,” nia dehan iha Otél Timor, Kinta (30/06).
Nia subliña, husi USAID kontente tebes ba lansamentu ida ne’e, tanba USAID nia parseiru sira iha kapasidade atu hala’o peskiza ida ne’e, no peskiza ida ne’e sei Informa ba sira nia advokasia ba sira nia konstituinte sira.
“Peskiza ida ne’e bazeia ba evidénsia fundamental tebes hodi dezenvolve advokasia ida ne’ebé susesu, permiti organizasaun sira hatene rezultadu saida mak sira hakarak atu promove iha sira nia advokasia no ajuda sira atu hatene diak liu tan motivasaun sidadaun sira nian, dezafiu sira no eleva pontu sira ne’ebé bele fo’o rezultadu pozitivu”. Nia haktuir.
USAID nia funsaun atu tulun atividade ONG Timor-Leste sira, atu hadi’a sira nia kapasidade organizasaun no administrativu, advokasia, peskiza, análize no kapasidade atu responde diak liu tan ba konstituinte sira, haburas fonte rendimentu oi-oin no regulár, no promove ambiente ida ne’ebé bele haforsa ONG independente sira.
“Ami nafatin kontinua serbisu hamutuk ho parseiru ONG sira ne’e, hodi kontinua informasaun sira ne’e, no bele ajuda sira hodi bele halo advokasia ba mudansa serbisu sira ne’ebé mak Governu TL fornese ba sidadaun sira,” nia hakotu
1,773 total views, 3 views today
Bele hare Video Seluk :