(Reportajen Jornalista Estajiadu Mariano Abi/Asistente editor Hermenegildo da Costa Tilman)
DILI (Timor Post) – Kontrola tabaku ilisitu ne’ebé hetan bandu hosi Estadu no Governu Timor Leste hodi labele fa’an ona iha merkadu, maka Autoridade Inspesaun no Fiskalizasaun ba Atividade Ekonomia (AIFAESA) hamutuk ho Polisia Nasional Timor Leste (PNTL) halo inspesaun konjunta.
“Inspesaun konjunta ida ne’e hala’o bazeia ba dekretu lei númeru 14/2016, loron 08 Fulan Juñu, kona bá rejime ba kontrolu tabaku.”
Hateten Sub-Inspetór ALFAESA, I.P, Dionisio Neto da Silva ba Jornalista sira iha Merkadu Taibessi, Sesta, (11/03/2022), hafoin remata halo inspesaun iha fatin ne’e.
Nia esplika liutan, iha lei Timor-Leste nian hakerek ona atu la permite vendedor sira komersializa produtu tabaku ne’ebé hetan bandu.
“Inspesaun konjunta ne’e para konfirma deit tuir lei maka iha ita nia vendedor sira nafatin komersializa, ami sei halo atuasaun ba produtu tabaku ilisitu,” dehan Dionisio.
Tabaku ilisitu hatutan Dionisio, nu’udar produtu ne’ebé klasifika ona hanesan illegal. Tanba lei rasik la admite hodi komersializa iha merkadu.
Hatan Timor Post kona bá sansaun Dionisio deklara, tuir kompetensia ne’ebé hosi AIFEASA,I.P hetan sei prosesa tuir dekretu lei hateten sei multa minimu U$70.00 no maximu to’o U$1,000.00.
“Durante ne’e AIFAESA, I.P divulga informasaun ba vendedor sira liga ho produtu ne’ebé sira komersializa tenke tuir lei. Maibé la kumpri lei mak sei la tollera,” tenik Dionisio.(Lee Notisia seluk iha Jornal Timor Post/ Asesu You Tube Timor Post)
528 total views, 18 views today
