(Reportajen Jaime Pires/Editora Suzana Cardoso)
DILI (Timor Post) – Selebra tinan foun Xineza nian, komunidade Xineza iha Timor-Leste (TL) selebra ho modelu balada tiger.
“Ohin ami selebra tinan foun komunidade Xina nian. Tinan kotuk, ami selebra tinan hanesan balada Karau nian. Maibé nia remata tiha ona hodi kalan. Agora ami tama fali ba tinan balada tiger nian.”
Lia hirak ne’e hato’o husi Prezidente Asosiasaun Komunidade Xineza iha Timor-Leste, Kathleen Conçalves ba Jornalista sira iha uma Xina Maromak Bairru Formoza, Tersa (01/02/2022).
Nia esplika liután, animal ida tiger ne’e siak. Maibé, nia mós animal ida ne’ebé mak forte. Nune’e, husu ba komunidade Xineza iha TL atu tenke forsa hanesan animal tiger ne’ebé mak selebra iha tinan foun ne’e.
Aleinde ne’e katak Kathleen, komunidade Xineza iha Timor-Leste tenke servisu hamutuk. Tenke iha; unidade, fraternidade hodi hametin liu sira nia Amizade hodi hala’o vida ekonomia iha Timor-Leste ho forsa liután.
Kathleen esplika, Segunda, (31/01/2022) kalan, hanesan Katólika nian karik hanesan Loron 31 Dezembru 2022 ne’ebé sira halibur malu han, hemu no festeja hamutuk. Ohin Tersa, (01/02/2022) tama ona ba tinan foun.
“Ne’ebé ohin ita nia Dragon Dance mai sambaya iha Xina Maromak. Sira sai ona ba ita nia loja emprezáriu Xineza sira nia fatin. Iha Xina Maromak hodi dudu sai hotu sorte ne’ebé mak ladi’ak no fo’er sira ne’ebé iha atu hare fali tinan foun no lori sorte foun ba negósiu no família hotu-hotu,” tenik Kathleen.(Lee notísia seluk iha Jornál Timor Post/ Asesu You Tube Timor Post)
810 total views, 3 views today
Bele hare Video Seluk :