(Reportájen Jaime Pires/Editora Suzana Cardoso)
DILI (Timor Post) – Pinta pornografia ba farda eskola hodi espresa haksolok pasa iha ezame nasionál tinan 2021 nian, reprezentante povu iha uma fukun Parlamentu Nasionál (PN) husu ba Ministériu Edukasaun Juventude no Desportu (MEJD) atu fó sansaun todan ba estudante finalista hirak ne’e.
Lee Notisia Relevante: Uza Atributu Artemarsiais Arbiru Estudante Laos Ema Matenek
Tuir Prezidente Komisaun ‘G’ trata asuntu edukasaun no arte kultura, Deputadu António Verdial, liuhusi plenária, Segunda, (24/01/2022) hateten, triste haree video no imajen estudante finalista sira pinta no riska pornografia iha sira nia farda ne’ebé agora viral iha media sosiál sira.
“Ha’u hanesan Prezidente komisaun ‘G’ iha Parlamentu Nasionál triste tebes, haree video no imajen sira agora viral loos iha media sosiál, konaba estudante finalista sira pinta no riska sira nia farda ne’ebé mak durante tinan naruk sira uza hodi buka matenek ho pornografia. Estudante finalista nia atetude ne’e mal edukadu,” hateten Deputadu António ho lian hirus.
Nu’udar Deputadu iha Parlamentu Nasionál, António husu ba governu atu fó sansaun todan ba estudante mal edukadu sira ne’e. No husu ba governu atu halo lei ka regra rigorozu ba eskola sira atu nune’e ba oin labele akontese tan.
Maibé atitude mal edukadu ne’e laos de’it responsavel hosi MEJD. Nune’e, Deputadu António husu atu servisu hamutuk ho manorin na’in sira iha territóriu tomak hodi trata asuntu ne’e ho didi’ak hodi dignifika fila fali edukasaun ida ne’ebé mak dignu no edukadu.
“Favor ida, Ministériu Edukasaun tenke kria rezolusaun ida ba estudante finalista iha territóriu Timor-Leste atu sira labele hatudu tan hahalok bandalizmu sira ne’e. Iha rezolusaun ne’e tau kedas sansaun ne’ebé mak todan atu kada tinan estudante sira labele hatudu sira nia hahalok aat hanensan ne’e,” hakilar Deputadu António.
Aliende ne’e Deputadu António ezizi ba Ministériu Edukasaun servisu hamutuk ho manorin na’in sira hotu atu identifika estudante bandalizmu sira ne’e para labele fó sira nia diploma to’o sira responsabiliza ba atitude ida ne’ebé estraga ona imajen juventude sira nian ne’e.
Lia fuan hanesan hato’o hosi Deputadu husi Bankada PLP, Domingas Dos Santos. Nia hateten, estudante finalista husi sekundária sira ne’ebé mak uza pintores pornografia ba ninia farda eskola ne’e aat tebes. “Ha’u hanoin edukasaun presiza identifika. Tenke fó medida rigorozu ba estudante sira ne’e”, tenik Deputadu Domingas.
Hanesan publika ona iha online Timor Post ne’e katak, iha loron Sabadu, (22/01/2022) eskola hotu-hotu anunsiu rezultadu ezame nasional. Tinan-tinan hafoin anunsiu rezultadu estudante finalista sira espresa sira nia pasa ezame nasional ne’e ho modelu oioin.(Lee notísia seluk iha jornál Timor Post/Asesu You Tube Timor Post)
1,004 total views, 6 views today
Bele hare Video Seluk :
Subscribe to Timorpost
