Jornalista Jaime Pires / Editór Noémio Falcão
DILI (Timor Post)—Profesional saúde sira iha Hospital Nacional Guido Valadares (HNGV) konsege salva vítima na’in-rua husi asidente trafegu karreta estadu xoke ho motor iha área Kolmera, Dili, Segunda (25/10/2021).
Redasaun Timor Post Online konfirma, notísia antes fó sai katak joven feto ne’ebé túr iha motorizada kotuk mate iha fatin akontesimentu, maibé to’o iha HNGV vítima iis sei iha. Redasaun Timor Post Online husu deskulpa ba vitima no familia ba publikasaun antes ne’e.
Família husi vítima ho naran kompletu Novelia Ana Leticia Soares, Triponio Marques hatete, dadaun ne’e sira iha HNGV akompaña hela iha Sala ICU.
“Sim, subliña la mate. Hafoin iha akontesimentu ema hotu hanoin nia mate fatin, maibé lori lalais ba HNGV konsege salva nia vida, no nia is iha fali ona maibé seidauk sadar,” Triponio ba Timor Post via telefone.
Entretantu observasaun Timor Post iha terrenu haktuir, kondutór ba karreta estadu husi Diresaun Nasionál Seguransa Patrimoniu Públiku (DNSPP) ne’ebé xoke motorizada ho marka Mio Bead ne’ebé tula ema na’in-rua iha Kolmera, Dili, ho kondisaun lanu.
Akontesimentu ne’e iha área Kolmera, maizumenus tuku tolu lorokraik ne’e. Polísia to’o kedas iha fatin akontesimentu hodi evakua vítima sira ba Hospital Nasionál Guido Valadares (HNGV).
Observasaun Jornalista Timor Post haktuir, karreta husi diresaun Komoro, motorizada husi parte Igreja Motael hetan xoke iha área Kolmera-Jardin 5 de Maio nia sorin.
Polísia detein ona kondutor iha sela polísia Eskuadra Kaikoli, Dili.
708 total views, 3 views today
Bele hare Video Seluk :