DILI (Timor Post)—Padre Violanto Soares husi kongregasaun Jesuíta hakotu iis tanba deskonfia atakasaun fuan (atracação cardíaco) hafoin diriji misa iha Kapela Casa Gonzaga Jesuíta, Perumnas, Dili, iha loron Segunda (13/09/2021) dader.
Tuir kronolojia ne’ebé haktuir husi família Padre Violanto katak, hafoin dirji misa, Padre foin túr atu matabisu iha kapela maka derepente de’it atakasaun no lori halai ba Klinika Fatumeta maibé la konsege salva.
Padre Bento Barros Pereira haktuir, Padre Violanto hakotu iis iha Maternidade, parte igreja no família sira prepara lori isin mate ba tau iha Igreja Balide, Dili hodi prepara ba serimónia funeral.
Padre Violanto iha Arkedioseze asume knaar nu’udar Responsavel ba Grupu Kategoriais Igreja nian, nu’udar Diretór Nasional de MEJ de Timor Leste no Diretór Nasional Apostolado da Oracao de Timor Leste.
Padre Violanto nu’udar Ainaro-oan, moris iha loron 04 Outubru 1964.
Durante moris, Padre Violanto konsege hasai kursu kona-ba Psikolojia iha STF Jakarta.
Hafoin ne’e Padre Violanto hasai mos kursu Teologia iha Loyola School of Theology iha Ateneo de Manila University. No Padre kontinua ba Pastorale Giovanile e Catechetica iha Universidade Pontificia Salesiana iha Roma.
Ho Padre Violanto nia mate, família no kolega sira hakfodak no sente lakon boot ida.
“Triste rona Amu Violanto fila ona ba Aman Maromak nian Kadunan Santu. Hatoo sentidu kondolénsia klean ba Família Jesuita ho família Amu Violanto. Deskansa ho hakmatek Amu. Sai reja na’in ba ami,” Eis Reitór DIT, Estanislau Saldanha públika iha nia pájina ofisiál Facebook.
Jesica Kawengian de Jesus ho triste fó adeus ba Padre Violanto nu’udar bibi atan di’ak ne’ebé husik mundu ne’e sedu liu.
“Boa viajen ba lalehan, Pe. Violanto, SJ. Bibi Atan Di’ak, Simples no Umilde,” Jesica hakerek iha nia pájina offisiál Facebook. (cao)
862 total views, 3 views today
Bele hare Video Seluk :
Subscribe to Timorpost
