DILI (Timor Post)—Reprezentante povu iha uma fukun Parlamentu Nasionál sujere ba oitavu governu konstitusionál atu kontinua hatama produtu lokál husi munisípiu sira mai kapitál Dili para populasaun sira bele asesu modo fresku durante konfinamentu obrigatóriu no negosiante sira bele hetan osan hodi sustenta família.
Sekretaria Meza Parlamentu Nasionál, Deputada Lidia Norberta dos Santos, hato’o asuntu ne’e tanba agrikultór barak mak produs produtu, maibé sira labele asesu mai kapitál no ida ne’e difikulta tebes ba sira nia ekonomia família.
“Ami sujere ba governu atu haree mekanizmu oinsá para bele asegura no produtu labele kotu,” deputada Lidia iha diskusaun estraordináriu plenária Parlamentu Nasionál, Tersa (31/08).
Reprezentante povu ne’e esplika, agrikultór sira iha munisípiu produs tiha ona sira ninia produtu rasik, hanesan fehuk, talas, ai-farina, haas, hudi inklui produtu sira seluk tanba ne’e governu tenke loke dalan ba sira hodi hatama mai Dili.
Portantu, maske komunidade barak mak seidauk simu vasina, maibé komunidade barak mós simu tiha ona vasinasaun. Tanba ema hirak ne’ebé mak seidauk vasina, atu lori sira nia produtu mós susar tanba sira ta’uk.
“Ita haree sira ninia sasán ne’e dodok de’it no balun fó hahán ba sira nia animal deit,” nia preokupa.
Nia dehan, agrikultór sira ninia produtu lori mai Dili atu troka ba osan, nune’e sira bele sosa fali sasán sira seluk, hanesan mina, foos inklui nesesidade sira seluk.
Tanba ne’e, bankada governu husu Ministériu Saúde, oinsá mak atu haree sidadaun ne’ebé mak seidauk simu vasina, maibé sira kontinua produs sasán.
Baibain haree agrikultór ne’ebé mak mai to’o fronteira entre kapitál ho munisipál, hanesan Aileu, Likisá, Ermera no Manatutu la konsege tama, tanba Dili aplika hela konfinamentu obrigatoriu. (kyt)
1,544 total views, 3 views today
Bele hare Video Seluk :