DILI (Timor Post)—Organizasaun Naun Governamentál (ONG) ba Futuru no Organizasaun Naun Governamentál (ONG) Child Fund asina nota entendimentu ba programa “ Espasu Amigavel Ba Labarik” iha munisípiu Dili, iha edifísiu Child Fund Kolmera, fulan hirak liubá.
Asina nota entendimentu ne’e hosi Diretora ONG Ba Futuru, Juliana Marçal ho reprezenta hosi country Director Child Fund Timor-Leste, Erine Dijkstra.
Programa ne’e sei utiliza orsamentu $42,266, períodu fulan neen (6) ba ne’e benefisiáriu 1,200, kompostu hosi Labarik 800 no inan-aman 400.
Country Director Chuld Fund Timor-Leste, Erine Dijkstra, hatete asina MOU ida ne’e ho NGO Ba Futuru tanba NGO Child Fund kria ona relasaun parseria iha tinan barak nian laran no hatudu ona rezultadu pozitivu durante implementa programa edukasionál iha pasadu.
“Nune’e ami fiar katak programa ida ne’e sei produs rezultadu di’ak ba labarik sira bainhira servisu hamutuk ho NGO Ba Futuru. Programa espasu ami gavel ba labarik hanesan programa ida ne’ebé di’ak ba labarik sira atu bele aprende no halo rekuperasaun ba sira nia mentalidade liuhosi atividade apoiu psikososiál, inklui halo animasaun, kanta, pinta no atividade edukasionál sira seluk”, Erine Dijkstra haktuir.
Programa ne’e sei estabelese iha fatin 10 hosi suku rua iha Postu Administrativu Dom Aleixo, Munisípiu Dili, kompostu hosi Sentru Evakuasaun Dom Bosco, Bairru Tali-Laran, Raikuak, Masin Lidun, Fatu Banku, Basi Mean, Bairru Mane iha suku Comoro no Sentru Evakuasaun Manleuana iha Suku Manleuana.
Entretantu iha fatin hanesan Diretora NGO Ba Futuru, Juliana Marçal, hateten iha akordu ne’e, NGO Child Fund Timor-Leste fó apoiu orsamentu ho total osan $ 42,266 (dolar amerikanu rihun haat nulu resin rua, atus rua neen nulu resin neen)-hodi kontinua implementa programa “Espasu Amigavel Ba Labarik”, ne’ebé antes ne’e implementa direta hosi UNICEF, dezde fulan Abríl 2021, hafoin inundasaun iha Dili ne’ebé rezulta komunidade sira-nia hela fatin barak mak aat no afeta más labarik barak mak enfrenta problema mental no psiko-sosiál.
“Iha programa ne’e, ONG Ba Futuru sei apoiu ba labarik ho tinan3-5 no 6-12, ne’ebé enfrenta problema Psiko-sosiál, liuhosi atividade animasaun, kanta, pinta no atividade edukasionál seluk. Sei iha mós programa hametin família ba inan aman no enkarregadu sira, atu iha koñesimentu adekuadu hodi apoiu sira-nia oan nia edukasaun, hafoin inundasaun fulan Abríl 2021,”Diretóra NGO Ba Futuru, Juliana Marçal hateten.
Tuir Diretora Juliana Marçal, atu realiza programa ne’e, ONG ba Futuru sei rekruta voluntáriu na’in 20 hosi Suku Comoro no Manleuana, hodi fasilita atividade psiko-sosiál no programa hametin família.
Programa ida ne’e sei hala’o durante fulan 6 nian laran, hahú husi fulan Juñu no sei remata iha fulan Novembru 2021, total husi benefisiáriu sira ne’ebé mak sei alkansa hosi programa ne’e hamutuk 1200, kompostu hosi labarik no inan-aman no enkarregadu sira.
Notísia ne’e Diáriu Timor Post Asesu liuhosi komunikadu imprensa ONG Ba Futuru nian, Kinta (05/08). (PJ3)
744 total views, 3 views today
Bele hare Video Seluk :
Subscribe to Timorpost
