DILI (Timor Post) —Negosiante sira hahú fa’an fali sasán iha resintu eskola nian hafoin Governu liu husi Ministériu Edukasaun, Juventude no Desportu (MEJD) reativa hikas eskola iha munisípiu Dili, Kuarta (21/07).
Observasaun ne’ebé Jornalista Timor Post halo iha terenu, iha loron Kuarta-feira (21/07) ne’e, haree katak maioria eskola iha munisípiu Dili reativa hikas aula hafoin fulan hirak nia laran taka tanba pandemia Covid-19 ne’ebé afeta mós nasaun Timor-Leste liu-liu kapitál Dili.
Portantu, total eskola iha munisípiu Dili hamutuk 197. Husi númeru ne’e, eskola maioria mak komunidade hahú fa’an sira nia sasán iha resintu eskola.
“Ohin ami fa’an fali sasán ona maski ladún folin hanesan uluk molok corona ne’e. Uluk molok corona, loron ida ami hetan tun liu mak $50, maibé depois de corona hahú iha tinan kotuk, ami la hetan buat ida tanba eskola taka,” negosiante Ana Freitas hatete, iha resintu eskola 10 Dezembru, Dili.
Dezde semana kotuk depois de Ministériu Edukasaun anúnsiu atu reativa eskola, komunidade sira mós hahú prepara sira nia sasán hodi fa’an fali hanesan baibain.
Iha mós sasán hirak ne’ebé komunidade sira fa’an iha resintu eskola, mak hanesan bee água, dose, has, inklui sasán ki’ik seluk ne’ebé mak estudante sira gosta atu konsumu.
Tuir Ana, katak moras Covid-19 seidauk tama iha Timor-Leste loron ida hetan osan husi $40 to’o $100, maibé agora ne’e kada loron hetan osan boot liu mak $10.
“Ohin ha’u la hetan osan, baibain to’o meudia hanesan ne’e ha’u hetan ona $40 ba leten,” nia katak.
Nia dehan, agora fa’an dose mós arraska tanba buat hotu-hotu karun. Kuandu atu fa’an estudante sirala hola tanba karun, ezemplu ki’ik mak plástiku ne’e agora folin sa’e.
“Ami atu fa’an dose mós ladi’ak, ohin ami fa’an hanesan uluk ami fa’an bee no buat seluk tan ne’ebé mak labarik sira gosta atu han,” nia esplika.
Ana konta, fa’an sasán iha resintu eskola Ensinu Sekundáriu Jerál 10 Dezembru, dezde uluk okupasaun Indonezia nian to’o ohin lorn.
“Agora ha’u nia oan na’in rua eskola tan iha UNTL, ha’u tenke fa’an sasán tanba ha’u selu ho ida ne’e de’it,” nia katak.
Entretantu, inan feton sira iha ne’ebé mak fa’an sasán, hanesan iha eskola privadu São Pedro Komoro, haktuir sira foin fa’an loron ida tanba eskola foin hahú maibé to’o tuku rua mós labarik sira la sosa. (ono)
1,352 total views, 3 views today
Bele hare Video Seluk :
Subscribe to Timorpost
