ADVERTISEMENT

Rega Bokon, Xanana Hola Pentolang

Timor Post - Dili · Ekonomia
  • Share
Hafoin remata hamoos baleta iha Eskola 4 Setembru Balide nia oin, Kay Rala Xanana Gusmão sosa pentolang hodi fahe ba komunidade. (Foto TP/Jose Mauno)

(Reportájen José Mauno/Editor Suzana Cardoso)

DILI (Timor Post) – Tanba hetan rega bokon ba motor no gerobak ne’ebé nakonu ho naan pentolang iha laran, maka hafoin remata haksolok no fó haris labarik sira , Lider Nasionál Kay Rala Xanana Gusmão   sosa naan pentolang ne’e hodi fó tulun ba negosiante ne’e.

ADVERTISEMENT
SCROLL FILA BA NOTISIA


“Ha’u ohin mai uluk iha ne’e, seidauk to’o óras ida. Lakleur Avo Nana (Xanana) mai hamoos foer iha baleta laran. Avo Nana mós ajuda bombeirus sira rega estrada laran no jardim eskola 4 Setembru Balide too hau nia gerobak no motor bokon hotu.”

Esplika na’in ba pentolang, Fernando Punef husi Rejiaun Administrativa Espesial Oe-Kuse Ambenu (RAEOA) ba Timor Post, foin lalais ne’e, ho kontenti hafoin simu osan husi Xanana ne’ebé sosa hotu ninia naan kabuar (Pentolang-Lian Indonezia).

Fernando Punef negosiante pentolang ne’ebé prepara ona atu fila ba nia uma.( Foto TP/Jose Mauno)

Fernando ho espresaun kontenti konta, Avo Nana lidera ema lubun no labarik sira halo limpeza ba baleta kuak iha eskola públiku 4 Setembru, Balide. Remata limpeza, hamutuk ho bombeiros mai rega rai rahun sira iha ne’e. Hafoin nune’e Avo Nana lori manggera rega ba labarik no komunidade hirak ne’ebé hamrik besik iha ne’e.

Lee Mós :
Xanana Halo Tradusaun ba Poezia ho Matan Been

Katak Fernando, Avo Nana ho labarik sira hadau malu hodi sei aan ba be’e ne’ebé tiru sai husi manggera boot bombeiros nian. Bee husi manggera ne’e see ba-mai, balun haksoit kona motor no gerobak pentolang. Labarik sira haksolok ho Avo Nana iha bee laran.

“To’o bee ne’e rega kona iha motor no gerobak pentolang nia lolon bokon hotu. Hafoin remata halimar bee, Avo Nana hakbesik mai sosa hotu naan pentolang hodi balun fahe ba labarik sira no balun seluk fahe ba sira ne’ebé hamrik iha estrada ibun,” dehan Fernando hodi hatutan.

Pentolang ne’ebé bee rega bokon ne’e hanesan grasa no bensaun ida husi lider karismatiku Avo Nana ne’ebé sempre besik ho povu. Hamutuk pentolang U$50.00 maka lori husi uma ohin dader. Balun ema sosa tiha ona. Restu U$37.00 Avo Nana sosa hotu kedas.

Lider karismatika Kay Rala Xanana Gusmão sura pentolang antes atu fahe. (Foto TP/Jose Mauno)

Konta Fernando, loron ida halo pentolang maizu menus U$50.00 hodi ba faan. Bai-bain faan too kalan.,tuku 21:00 maka foin fila uma. Maibé ohin sorte boot. Ho Avo Nana nia tulun, halo nia fila sedu. Foin tuku 16:00 deit, pentolang hotu ona.

Lee Mós :
Hametin Amizade Entre Estudante ho Estudante

“Ha’u sente kontente tebes. Ohin Avo Nana borong (sosa hotu) ha’u nia pentolang hamutuk U$37.00. Ha’u fila ona ba uma hodi halo preparasaun ba loron aban nian. Loron-loron faan pentolang hamutuk U$50.00. Dala ruma hotu. Dala ruma mós la hotu,” Fernando haktuir.

Lider Nasional Kay Rala Xanana Gusmao sura pentolang iha negosiante Fernando Punef nia oin. (Foto TP/Jose Mauno)

Tuir observasaun Timor Post katak, lider karismatiku Kay Rala Xanana Gusmão hamutuk ho joven voluntariu sira no bombeirus hamoos fo’er iha baleta Balidi, eskola 4 de Setembru nia oin. Remata hamoos foer, kareta bombeirus mós loke bee. Avo Nana kaer manggera rega foer no tahu hirak ne’ebé belit iha estrada laran.

Hafoin rega iha Estrada laran, Avo Nana rega komunidade no labarik sira ne’ebé balun hamrik iha Estrada ninin no balun seluk hamriik iha baleta ninin. Sira ho antusiazmu haksoit simu hasoru bee ne’ebé naksulin husi manggera hodi hamoos sira nia isin lolon ne’ebé nakonu ho tahu dodok.

Lee Mós :
INDICA Husu Kandidatura PR Asegura Labarik Sira Durante Kampaña

Remata rega fo’er Avo Nana hola pentolang hamutuk dolar U$37.00 hodi fahe ba  komunidade nomos labarik sira ne’ebé haksolok hamutuk iha ne’eba. Ferik no katuas sira ne’ebé hamriik besik Avo Nana mos simu pentolang. Hanesan baibain, prezensa Avo Nana sempre hadau malu husi komunidade. Balun hadau malu atu hasai foto no balun seluk hakarak hakbesik aan ba Avo Nana hodi simu pentolang.

“Simu hotu fila ba uma. Simu hotu fila ba uma,” hateten Avo Nana ba labarik sira, bainhira ba simu pentolang. Balun simu ida, balun seluk simu rua ou tolu. Remata fahe pentolang, Avo Nana ho ropa bokon sae karreta fila uma no komunidade sira mós fahe malu.(Lee notísia seluk iha jornál Timor Post)

 993 total views,  3 views today

Oinsa Ita nia Reaksaun iha Notisia Nee?
Like
Love
Haha
Wow
Sad
Angry
You have reacted on “Rega Bokon, Xanana Hola Pentolang” A few seconds ago

Bele hare Video Seluk :
  • Share
ADVERTISEMENT
SCROLL FILA BA NOTISIA

Notisia Timorpost Seluk


Komentariu :
Timorpost.com. Respeita tebes Ita Nia opiniaun. Laran luak no uza etika bainhira hatoo opiniaun. Opiniaun iha Ita Nia responsabilidsde, tuir lei ITE.

Varanda
Kategoria
Video
Buka
Watch
Facebook
error:
Simu Notifikasaun Hosi Timor Post Online! OK No