(Reportájen Jose Mauno/Editor Suzana Cardoso)
DILI (Timor Post) — Atu prevene transmisaun moras Covid-19 iha eskola maka ministru edukasaun juventude no desportu, Armindo Maia husu ba profesór no estudante inklui inan aman sira atu simu vasina.
“Governu mós sei ba hare eskola ne’ebé mak persentajen profesór sira vasina barak ona mak sei reativa fila fali prosesu aprendiajen nian. Ne’e kondisaun ida. Sira ne’ebé sei toba hela (Seidauk preparadu-Red), entaun husik lai ba. Maibé ministériu sei foti medida.”
Lia fuan hirak ne’e hateten husi Ministru Edukasaun Juventude no Desportu (MEJD), Armindo Maia ba Jornalista bainhira simu vasina Dose Segundu iha Centro Convenção Dili (CCD), Merkadu Lama, Dili, Tersa, (22/06/2021).
Nia apela, sirkular sai tiha ona husi MEJD ba funsionáriu no profesór sira hodi apela ba estudante sira ne’ebé mak tinan 18 ba leten atu hotu-hotu ba tuir vasina. Inklui mós inan-aman. Nune’e deit mak prosesu aprendijazem bele hahu fila fali.
Katak MEJD Armindo, eskola sira ne’ebé mak durante ne’e suspende tanba Covid-19 hotu-hotu tenki ba tuir vasina. Nune’e deit mak eskola bele loke fila-fali ho lalalis. Aliende ne’e, governu sei esforsu atu nune’e bele fó kondisaun ba eskola sira hodi nafatin kumpri protokolu saúde mundial.
“Hotu-hotu vasina ona no eskola priense ona kondisaun protokolu saúde nian maka foin bele loke fila fali eskola. Tanba ami hotu-hotu vasina hotu ona. Agora fila fali ba mestri sira. Alin oan sira. No inan-aman sira,” haktuir MEJD Armindo. (Lee notísia seluk iha jornál Timor Post)
850 total views, 3 views today
Bele hare Video Seluk :