(Reportanjen José Mauno/Editor Suzana Cardoso)
DILI (Timor Post) – Hafoin hetan apoiu umanitáriu husi governu liu husi Sekretáriu Estadu Protesaun Sivíl (SEPS), hamutuk Xefe família 60 ho membru família nain 339 nu’udar vítima ba inundasaun no erosaun iha loron 4 Abríl 2021 ne’ebé evakua ba eskola 4 de Setembro Balidi fila hikas ona ba sira nia hela fatin.
“Objetivu ohin ita mai iha ne’e para ofisialmente ita taka sentru evakuasaun ida ne’e. Kuandu taka ona maka família sira sai ona husi fatin ne’e. Ida-idak fila ba nia uma, hafoin hetan apoiu umanitáriu.”
Diretór nasionál risku dezastre SEPS, Agostinho Gomes Belo fó sai informasaun ne’e ba Jornalista hafoin remata serimónia apoiu umanitáriu no taka sentru evakasaun iha eskola 4 de Setembru Balidi Dili, Kuarta, (26/05/2021).
Nia hateten, bazeia ba rezultadu diálogu husi parte protesaun sivíl no parseiru sira deside hodi fó apoiu umanitáriu ba xefe família 60 no membru família 339 iha sentru evakuasaun eskola 4 de Setembru Balidi.
Hafoin hetan apoiu umanitáriu husi governu liu husi Sekretáriu Estadu Protesaun Sivíl (SEPS) maka vítima ba inundasaun no erosaun iha loron 4 Abríl 2021 fila hikas ona ba sira nia hela fatin. Sentru evakuasaun refere taka ona.
Maske nune’e hateten Agostinho, governu nafatin fó apoiu ba família vítima inundasaun. Apoiu hirak ne’e mak hanesan foos, mina, supermi no ikan kalén. Aliende , sasán dapur nian, sasán ba inan feton sira, sasán ba labarik sira, lona no seluk tan.
Diretór nasionál risku dezastre, SEPS ne’e dehan, faze ida ba rekuperasaun ekipa konjuntu ne’ebé lidera husi governu hamutuk ho parseiru hotu la’o hela. Hanesan asesmentu no verifikasaun ba uma mós ita iha hotu ona dadus hirak ne’e agora iha prosesu aprovasaun.”
Katak Agostinho, hafoin família sira fila ba uma iha tempu badak sira sei hetan direitu atu hetan matéria konstrusaun. Ita hotu akompañia. hahú ona husi suku Bemori, Balibar ohin ita halo cross check.
Diretór Agostinho informa tan, husi inisiu iha sentru evakuasaun nasionál liliu iha Dili hamutuk 53. Entaun husi loron 4 fulan Abríl to’o agora sentru evakuasaun ativu hela 12. “Ohin ida ne’e taka tan entaun hela sentru evakuasaun 11. Populasaun iha sentru evakuasaun 12 ne’e hamutuk xefe família 354 no membru família hamutuk 1.541,” katak Agostinho hodi hatutan.
Dadus protesaun sivíl ne’ebé mak iha; total família simu ona apoiu umanitáriu iha nivel nasionál hamutuk 14.000. Seidauk simu família 14.427 mak iha prosesu atu fó apoiu umanitáriu. Daudaun ne’e protesaun sivil esforsu maka’as hela.
Iha fatin hanesan reprezentante família vítima, Jerónimo Afonso hateten, hanesan família vítima to’o agora sira seidauk hetan ajudu ba matéria konstrusaun. “Ajudu hanesan nesesidade bázika hetan ona. Ajuda ne’e ami hetan ajudu husi ONG balun no governu,” lamenta Jerónimo.(Lee notísia seluk iha jornál Timor Post)
872 total views, 3 views today
Bele hare Video Seluk :
Subscribe to Timorpost
