(Reportájen José Mauno/Editor Suzana Cardoso)
DILI (Timor Post) – Atu kapasita funsionáriu ba nivel ensinu superior maka Radio Televizaun Timor-Leste Empreza Públiku (RTTL.E.P) ho Universidade Nasionál Timor Lorosa’e (UNTL) asina Memorandum of Understanding (MoU) ho durasaun tinan lima.
“Ami foku ba area jornalizmu de’it. Jornalizmu iha agrikultura, edukasaun no saúde. Buat ne’ebé mak iha UNTL ami hakarak hetan oportunidade. Hakarak husi UNTL oferese espasu ba ami nia jornalista tanba ami iha ne’ebá iha nain 197. Balun graduasaun ona. Balun seluk seidauk.”
Prezidente Administrativu RTTL.E.P, José Antonio Belo hatún lia ne’e ba jornalista sira hafoin remata asina MoU iha salaun Ian Martin, Balidi, Dili, Tersa, (25/05/2021).
Nia hateten, Instituisaun RTTL.E.P hakarak hametin kooperasaun ho UNTL atu bele habelar liután sira ninia ema iha UNTL. Aumentatan kapasidade iha area oi-oin hodi halo profisionalizmu liután instituisaun RTTL nian.
“Ami iha ema graduadu lubuk ida. Balun seidauk hetan graduasaun. Ami tenke ba fila fali kampus. Depende ba kolega sira hakarak iha area saida,” tenik José hodi hatutan, tanba liu husi formasaun mak ema bolu dehan profionalisa instituisaun ba tempu naruk.
Hatutan José, kualkér funsionariu RTTL,E.P ne’ebé mak ba eskola iha UNTL sei asina akordu ho RTTL para fó espasu ba eskola. Maske eskola sira kontinua servisu iha RTTL. Nune’e, mak tinan ida ne’e halo ona preparasaun. Implementasaun MoU ne’e sei realiza iha tinan oin. Aliende ne’e RTTL sei oferese espasu ba dosente no dekanu fakuldade hotu-hotu hodi halo debate akadémiku ba dezenvolvimentu país ninian.
Iha fatin hanesan reitór UNTL, João Soares Martins hateten, primeira vés halo kooperasaun entre UNTL ho RTTL. E.P. Kooperasaun ne’e nu’udar momentu ida para bele servisu hamutuk entre RTTL ho UNTL hodi ajuda habelar atividade akadémika. Peskiza komunitaria ne’ebé mak universidade hala’o.
“Ami kontente para RTTL halo kobertura barak. Akordu ne’e normalmente tinan lima,” dehan João hodi hatutan kona-ba fó bolsu estudu ba jornalista sira, Reitór UNTL ne’e hateten sira sei diskute hamutuk.(Lee notisia seluk iha jornal Timor Post)
705 total views, 3 views today
Bele hare Video Seluk :
Subscribe to Timorpost
