ADVERTISEMENT

Guilhermina Hetan Valor A’as Liu iha Ezame Eskrita ba Prezidente Autoridade Munisípiu Dili

Timor Post - Dili
  • Share
Guilhermina Filomena Saldanha

Timor Post (24/02/2021)—Guilhermina Filomena Saldanha liu ona iha selesaun eskrita ho valór ezame klasifikasaun kuantitativa 13.6 tanba fó resposta loos ba pergunta hamutuk 68.

Inkuantu kandidatu na’in-tolu seluk hetan valor hanesan 13.2, inklui Abílio Mesquita alias Mausoko, António Moniz Calau no Ivete de Fátima Sarmento de Oliveira, tanba fó resposta loos ba pergunta hamutuk 66.

Tuir fali kandidatu ho naran Sabino da Costa hetan valór 11.8 tanba fó resposta loos ba pergunta hamutuk 59.

Kandidatu Manuél da Silva hetan valór 10 tanba fó resposta loos ba pergunta 50. No Lorenço Rodrigues Pereira hetan de’it valór 9 la liu iha etapa ne’e tanba fó resposta loos de’it ba pergunta hamutuk 45, inkuantu tuir regra kandidatu sira fó resposta loos ida hetan valór 0,2 ho totál númeru ezame hamutuk 100.

Kandidatu sira tuir ezame iha loron 4/02/2021.

Antes ne’e, Vise-Ministru Administrasaun Estatál (MAE), Lino de Jesus Torrezão subliña, hafoin fó sai rejultadu ezame eskrita, nia parte sei aprejenta ba Konsellu Ministru maka halo desizaun finál ba kandidatu ne’ebé maka okupa kargu Prezidente Autoridade Munisípiu Dili.

Durante ne’e, kandidatu sira ba Prezidente Autoridade Munisípiu Dili nian hetan atensaun no apoiu husi públiku liuliu iha rede sosiál maka kandidatu Abílio Mausoko.

Komentáriu barak fó apoiu ba Mausoko nu’udar jerasaun foun rejisténsia ne’ebé nakonu ho espíritu no brani garante disiplina iha Dili no halo desizaun sira hodi rejolve problema lixu no populasaun sira hela arbiru iha sidade.

Maske nune’e, ho rejultadu ezame ne’ebé hatudu, Guilhermina mós mosu dadauk iha públiku ho vontade tomak.

Entrevista iha programa Ita Nia Bainaka iha RTTL.ep, ne’ebé hala’o iha Tersa (23/01/2021) kalan, Guilhermina subliña, saida maka motiva nia kandidata-an ba pasta ida ne’e maka liuliu nia rasik haree iha munisípiu sira seluk kandidatu sira dominante husi mane, inkuantu feto sira mós sai parte integrante ba dezenvolvimentu.

Gulhermina hatete, problema iha Dili la’ós lei ho regulamentu sira maibé implementasaun sira mak ladun forte. Tanba ne’e, nia afirma, saida maka nia halo bainhira asume pasta Prezidente Autoridade maka nia foku ba implementasaun lei ho planu ne’ebé di’ak liu.

“Ha’u nia vizaun ba futuru maka presiza prepara dezenvolvimentu potensialidade ne’ebé maka garante kresimentu ekonomia ho sustentabilidade iha kapital,” nia subliña.

Dili tenke sai sentru ekonomia ida ne’ebé forte no kualidade vida populasaun ne’ebé a’as.Dili tenke sai mós sentru sosial ne’ebé maka nakonu ho kultura. Nune’e hahú kedas ho rejolve problema sira liuliu halo ordenamentu hodi garante kualidade kapital ba nasaun nian. (cao)

 499 total views,  3 views today

Oinsa Ita nia Reaksaun iha Notisia Nee?
Like
Love
Haha
Wow
Sad
Angry
You have reacted on “Guilhermina Hetan Valor A’as Liu iha Ezame Eskr…” A few seconds ago

Lee Mós :
Xanana Gusmão ba Hatán Kazu Korrupsaun Iha Ministériu Públiku

Bele hare Video Seluk :
  • Share
ADVERTISEMENT
SCROLL FILA BA NOTISIA

Notisia Timorpost Seluk


Komentariu :
Timorpost.com. Respeita tebes Ita Nia opiniaun. Laran luak no uza etika bainhira hatoo opiniaun. Opiniaun iha Ita Nia responsabilidsde, tuir lei ITE.

Varanda
Kategoria
Video
Buka
Watch
Facebook
error:
Simu Notifikasaun Hosi Timor Post Online! OK No