Emerenciana Motu Bere
DILI-Joven feto ho naran Emerenciana Motu Bere (18) lakon nia vida tanba mate hosi atake rai-lakan bainhira akontese udan maka’as iha Aldeia Moleana, Suku Ritabou, Postu Administrativu Maliana, Munisípiu Bobonaru.
Kazu ne’e akontese iha loron Tersa feira (07/04) mais ou menus tuku 4:00 loro-kraik hafoin vítima fila hosi natar hamutuk ho nia prima, enkuantu motivu husi kazu ne’e udan anin no akompaña ho rai lakan.
Paulo Assis nu’udar vítima nian Professor haktuir ba Timor Post katak, vítima nu’udar estudante Eskola Téknika Agríkola Moleana (ETAM), remata ninia estudu iha tinan 2017, maibé daudaun ne’e vítima tuir hela kursu atu ba formasaun iha nasaun Israel.
Nia akaba tiha ona SPP iha tinan 2017, agora daudaun nia tuir tan kursu, preparasaun atu ba formasaun iha Israel, maibé horibainrua loro-kraik mais ou menus tuku 4:00 loro-kraik rona dehan rai lakan fera ona nia.
Mestre ne’e mós dehan, tuir informasaun ne’ebé nia rona katak, vítima ho família sira bainhira fila hosi natar mak dezastre ne’e mosu.
Enkuantu Xefe Aldeia Moleana, Bernadino de Araújo haktuir, horisehik tersa loro-kraik akontese udan makas iha Aldeia Moleana, no rai lakan mós makas, akontesimentu ne’e bainhira vítima sira fila hosi natar ba uma too iha dalan klaran hetan dezastre rai lakan fera vítima.
Tuir Bernadino, mate isin família foti hodi halo tuir prosesu funeral iha família nia uma no haloot kedas iha horisehik. kuarta 08/04 lokraik ne’e. (res)
1,059 total views, 3 views today
Bele hare Video Seluk :