DILI (timorpost.com) — Komandante Polisia Nasionál Timor-Leste (PNT) Munisípiu Bobonaru, Superintendente Polisia Antonio Maulutu, rejeita nia membru halo agresaun fíziku hasoru ema menór idade ho inisiál C iha Munisípiu Bobonaru.
“Membru na’in-tolu husi Komandu PNTL, deskonfia katak sira halo agresaun fíziku, hasoru menór idade ho inisiál C, ha’u la bele dehan, ida ne’e ha’u-nia membru sira mak halo ka lae,” ,” dehan Komandante Maulutu ba jornalista sira iha Komandu Jerál PNTL, Kaikoli, Kuarta (28/12).
Maibé, nia dehan haree iha prosesu hafoin hatene, maibé hakarak hatete de’it katak, hodi kalan ne’e, parte husi ekipa Komandu PNTL Bobonaru nian halo patrulla, bainhira hetan kontaktu husi Padre Pároku Maliana nian, katak joven sira sunu fugetis halo Padre, Madre no Komunidade sira deskansa la di’ak, tanba ne’e membru PNTL husi Komandu Bobonaru ba iha fatin refere, hodi halo prevensaun.
Nia hatete, tuir informasaun ne’ebé nia parte simu, katak hafoin patrulla husi Komandu PNTL to’o iha fatin ne’ebá, joven sira haree no halai sees husi fatin ne’e, labarik Menór idade ne’e halai mak monu ba fatuk, laiha polisia ida mak halo agresaun fíziku.
“Maibé, informasaun ne’ebé espalla iha media sosiál, katak ha’u-nia membru na’in-tolu mak halo agresaun fíziku, tanba ne’e ami buka tuir ema ne’ebé halo publikasaun ne’e, ami hetan ema ne’e Bobonaru nian,” nia dehan “Ita kontaktu ona ema ne’ebé halo publikasaun iha media sosiál, tanba iha ne’ebá nia hatete ha’u katak, Komandante Munisípiu Bobonaru ne’e toba dukur la haree ba situasaun ida ne’e, tanba ne’e ami hetan ona ema ne’e”.
Nia dehan, labarik menór idade ne’ebé deskonfia hetan agresaun fíziku ne’e, daudaun iha Ospitál hodi halo tratamentu.
Iha fatin hanesan, Portavós Komandu PNTL, Superintendente Xefe Arnaldo de Araújo, informa iha loron 27 fulan Dezembru tinan ne’e, mais ou menus 20:10 kalan, iha Maliana, akontesimentu iha Parókia Maliana Santa Krús, joven sira sunu no tiru fugetis iha area Eis Rezidénsia Amu Bispu, halo Padre, Madre no Komunidade sira toba la di’ak.
“Tanba ne’e, ita-nia Padre Parókia Maliana telefone ba iha ofisial Administrasaun PNTL, presiza PNTL nia prezensa iha fatin ne’ebé joven sira sunu fogete, nune’e Polisia to’o iha fatin konsege Kaptura duni ema joven na’in-rua Menór idade ne’ebé sunu hela fugetis iha ne’ebá,” nia hateten.
Portavós ne’e, haktuir, PNTL to’o iha fatin joven na’in-rua menór idade ho naran inisiál J sira kaptura hodi halo deklarasaun, no ida naran inisiál C halai no monu ba fatuk hodi rezulta kanek no daudaun ne’e halo tratamentu iha ospitál, tanba ne’e ita hein prosesu, hafoin ita bele hatene loloos motivu husi akontesimentu ida ne’e.
Alende ne’e nia dehan, joven balu ne’ebé halo anúnsiu informasaun iha media sosiál ne’e falsu, kona-ba akontesimentu iha Maliana, tanba ne’e, parte PNTL identifika ona suspeitu na’in-ida, nune’e iha tempu badak sei ba halo kapturasaun hodi foti deklarasaun.
1,270 total views, 3 views today
