DILI (timorpost.com) — Relasiona irrigasaun Maliana II ne’ebé kotu, ameasa ba natar hetares 30 resin tenke abandona iha tinan ida ne’e.
Deputada Bankada Partidu Libertasaun Popular (PLP), Domingas dos Santos, hatete nu’udar reprezentante povu haree situasaun ida ne’e iha terrenu, bainhira agrikultór levanta katak, sidade Maliana tomak, liuliu parte Memo sei hasoru hamlaha tanba rai hetares 30 resin maka sei abandona.
“Irrigasaun Maliana II, liuliu Mabilgol kotu fatin tolu kedas, ami hasoru malu ho agrikultór barak sira dehan se téknika tinan ida ne’e maka la hadi’a, Memo ka Maliana tomak sei hamlaha, tanba rai hetares 30 resin maka tenke abandona”, nia foti kestaun ida ne’e iha plenária Parlamentu Nasionál, Tersa (20/12).
Nia dehan, irrigasaun mota Mabilgol kotu fatin tolu ne’e halo agrikultór sira iha Maliana II labele halai Natar.
Nia afirma, povu agrikultór sira la halo produsaun, maka sei afeita mós ba programa oitavu Governu nian atu hasa’e produsaun ba produtu lokál.
“Natar sira la halo, batar mós sira la kuda tan ona, ha’u la hatene saida maka atu akontese?, ita-nia planu ka programa oitavu Governu atu hasa’e produsaun, halo produtu lokál barak ne’e, ha’u hanoin parese mehi de’it ona”, nia kestiona.
Tanba ne’e, Deputada Domingas, husu ba Governu, liuliu Ministériu Agrikultura atu bele halo koordenasaun hodi hadi’a irrigasaun ne’e ho mákina pezadu.
1,096 total views, 3 views today
