Balibo (TimorPost.com) – Sekretáriu Estudu Komunikasaun Sósial (SEKOMS), Mericio Juvinal Akara, husu ba Jornalista sira iha Média konvensionál no Média Dijitál atu sai ajente edukadór hodi eduka públika ho informasaun ne’ebé edukativu.
Nia hatete, média iha papél importante, ne’ebé ema hotu hanoin tenke konsidera, no fó espasu nune’e demokrasia iha Timor-Leste sai buras liután.
“Média ka jornalistia tenke sai ajente edukadór, tanba média la’os sai instrumentu komunikasaun de’it, no la’os ema ko’alia ita halo lian para ema rona de’it, maibé sebele taes tan lian ne’ebé iha, nune’e bele transmite matenek ba ema seluk atu sai matenek liután”, nia diskursu, hafoin halo abertura ba diskusaun forum editoriál iha Balibo, Sábadu (15/10).
Nia dehan, na’in ba media no jornalista sira bele iha diskusaun di’ak liután ho hanoin krítiku, hanesan fundamentu ba knaar jornalista ka média nian ba futuru ida di’ak liután.
“Hanoin krítiku, ne’e tuir ha’u-nia perspetiva ne’e sai fundamentu importante ba média atu kontribui makas liután ba demokrasia ita nian, nune’e mós sai autór ba sivilizasaun ema nian iha ita-nia rain”, nia afirma.
Nia hatutan, Governu ne’ebé de’it labele julga média ne’ebé de’it, tanba média atu ajuda nasaun bele hetan sivilizasaun, Se julga produtu jornalizmu média nian, neineik sei julga ema nia sentimentu.
Sekretariu Estudu ne’e mós husu ba média sira atu labele tauk ba se de’it no mantein independensia editoriál.
Alende ne’e nia dehan, asuntu korrupsaun ruma tenke hato’o, maibé tenke taes halo didi’ak no lábele halo konviksaun iha laran.
Iha fatin hanesan, Diretór Konsellu Imprensa (KI), Rigoberto Monteiro, reforsa forum editoriál ne’e hanesan parte ida atu halibur ideia hotu husi na’in ba média no Jornalistia sira-nia hanoin, oinsá atu hadi’ak saida mak média no Jornalistia sira hasoru.
“Ita agradese tanba Governu rekoñese média nia kontribuisaun, nune’e Parlamentu Nasionál bele aprova loron 16 fulan Outubro hanesan loron liberdade imprensa nian. No iha parte ida, ita promove Balibo hanesan sidade liberdade”, nia hateten.
Iha Diskusaun fórum editoriál ne’e hanesan momentu ida atu halo diskusaun kle’an iha kode etika jornalista nian, iha era dijitalizasaun ohin loron.
No iha diskusaun ida ne’e atu fó hanoin mós ba KI nia serbisu sira durante ne’e sei hetan fallansu ruma, no mós diskusaun forum editoriál ne’e mós bele fó hanoin ba Governu oinsá atu hadi’a nia polítika ruma.
1,761 total views, 6 views today
Bele hare Video Seluk :
Subscribe to Timorpost
