BALIBO (timorpost.com) – Presidente Autoridade Munisípiu (PAM), Bobonaru Ernesto de Olivera Barreto, promete sei konstrui jardín Balibo Five hanesan fatin turizmu, no ida ne’e tama iha planu prioridade 2023 nian.
Prezidente Autoridade Munisípiu Bobonaru, Ernesto de Olivera Barreto, hatete planu ne’e iha, tékniku no sei rekruta tan tékniku 18, mai hamutuk tan ho tékniku senior sira, atu halo jardín ida iha fatin ida ne’e, maibé depende ba orsamentu ne’ebé atribui mai iha munisípiu, maibé sei la nonook.
“Depois de komemora loron ida ne’e, ha’u sei tuur hamutuk ho ha’u nia tékniku sira, atu ko’alia saida mak atu halo iha rai Balibo, nune’e, ami sei propoin ba nasionál atu haree asuntu ne’e, tanba fatin ida ne’e istóriku no Turizmu”, nia hatete ba Jornalista sira iha Balibo, Sábadu (15/10).
Prezidente Autoridade ne’e reforsa, Balibo Five sai fatin istória ida ba Timor Leste. Tanba ne’e mak tenke dezenvolve di’ak liu tan, nune’e sai imajen ida hodi hatudu ba mundu.
“Ohin ha’u haree ona, ba oin ita labele sai hanesan ne’e nafatin, ita labele dada lona beibeik, tanba ne’e imajen nasaun nian, liu-liu ne’e dalan protokolu ho nasaun viziñu Indonézia, tanba ne’e presiza dezenvolve fatin sira ne’e ho di’ak”, PAM Promete.
Hanesan Prezidente Autoridade, iha mós Planu, maibé planu ami nian ne’e limete, karik 2023, tama ba podér lokál konserteza orsamentu ne’e boot uitoan ona, sei tau prioridade ba Balibo Five.
“Tanba ita temi Balibo Five, ita la’ós tuur-tuur ne’e mosu, ne’e tanba liuhusi funu naruk ida ke jornalista na’in lima mate, tanba militár Indonézia oho iha ne’e, tanba hakarak fó vida ba rai ida ne’e no ohin loron komemora ba dala 47”, nia afirma
1,061 total views, 15 views today
