Maliana, 30 jullu 2022 (SRP)- Polisia Nasionál Timor-Leste (PNTL) Servisu Sekreta Unidade Patrullamentu Fronteira (UPF) postu Memo, halo patrulla lao ain iha dadeer madrugada ne’e konsege hetan sasán deskuñesidu ne’ebé komunidade sira tenta halo tranksaksaun ilegál iha area fronteira Memo, Postu-Administrativu Maliana, Munisípiu Bobonaro.
“Atu informa deit, dadeer ita-nia membru servisu sekreta sira halo vizilansia konsege deteta ema deskuñesidu ho motor tolu halo transaksaun ilegál ba Ai kameli iha Aldea Laho-Aman, Suku Memo, fronteira entre Timor-Leste ho Indonezia, maibe sasan hirak ne’e sei deskuñesidu tanba nain ho motor xapa matrikula laiha halai lakon tiha soe hela sasan iha natar laran”, informa Komandante UPF, Superintendente Polísia, Euclides Belo, via telfone iha loron kinta ne’e.
Nia dehan, agora dadauk sasan hirak ne’e asegura ona iha UPF kompañia Alfa Tunubibi, hodi halo prosesu no buka tuir suspeitu ne’ebé hatama sasan liuhosi dalan ilegál ne’e.
“Suspeitu sira ne’e konsidera deskuñesidu nune’e PNTL sei aprezenta objetu hirak ne’e ba Ministeriu Publiku hodi hein notifikasaun hafoin sei halo koordenasaun servisu hodi buka tuir nain ba objetu sira ne’e hodi kompleta prosesu investigasaun”, Euclides hakotu. #
538 total views, 3 views today
