DILI (Timor Post) – Impaktu hosi Covid-19 ne’ebé seidauk hatene nia remata, afinal fó impaktu boot ba toos nain sira nia produtu ba faan iha merkadu. Ida hosi toos nain ne’e maka Abel Asa.
“Modo sira iha kantadeiru ne’e kuda rasik. To’o tempu koleta dala barak ema la mai sosa. Lori ba faan iha merkadu entaum piur liu, tanba sira hatun folin. Ema sira mai sosa iha merkadu ne’e sira lori ba faan fila-fali.”
Esplika toos na’in Abel Asa ne’ebé produs Brinjela, mustarda no repollu iha Aldeia Raimaten, Suku Odomau, Postu Administrativu Maliana, Munisipiu Bobonaru. Nia hateten, hosi kuda modo ne’e maka tulun nia ekonomia família no oan sira ba eskola.
Aman hosi oan na’in tolu ne’e konta, tinan-tinan sempre kuda modo berinjela, mostarda no repollu. Tinan ida kuda dala rua. To’o fulan neen koilleta tiha kuda fali. Maibe ba mostarda ho repollu nia durasaun tempu fulan tolu de’it. Brinjela nia durasaun tempu too fulan lima.
Hatutan Abel, rezultadu husi modo sira ne’e, depende ba situasaun. Iha situasaun tempu udan, tenke uza material hanesan plástika hodi taka no halo tenda oan hodi hamahan modo para labele dodok no mós tahan ular oan ba modo.
Abel dehan, too tempu koleta dala ruma konsumidor sira mai hola direta nia folin sei as liu. Maibé tanba Covid-19 estadu bandu ema halo movimentu, obrigatoriu tenke lori ba merkadu nia presu tun liu.
“Lori ba merkadu maka nia folin mós tenke tuir presu merkadu nian. Tanba iha merkadu ema mós sosa no fa’an fali,” katak Abel ne’ebé tenke servisu mak’as hodi sustenta ekonomia família no tulun oan sira nia estudu.
Abel espresa, iha tempu Covid-19 ne’e rendimentu menus liu. Loron ida dala ruma hetan deit osan entre U$7 no U$8. Rendimentu ne’e dala barak la to’o hodi taka fali osan hirak ne’ebé gasta ba sosa pupuk no ai moruk seluk.
“Durante situasaun Covid-19 ne’e ami nu’udar agrikultur sente triste tebes. Ami nia produtu hosi modo hirak ne’e ema laiha atu mai sosa. Atu lori ba Kapitál Dili transporte laiha. Estadu bandu labele halo buat hotu-hotu, maka afeita ba ami nia osan lakon hotu deit para sosa pupuk no aimoruk modo nian,” katak Abel Asa hodi husu Governu nia atensaun ba situasaun Covid-19 ne’e.(mj11)
1,183 total views, 3 views today
Bele hare Video Seluk :