(Reportajen Jaime Pires/Editor Mateus da Cruz)
DILI (Timor Post)- Xefe Suku Uacala, Postu Administrativu Baguia, Munisípiu Baukau, David Manuel Freitas Brites, husu Prezidente Repúblika foun kria estabilidade no buka halo diálogu ho lider nasionál sira hotu.
“Entre sira na’in-2 ida ne’ebé mak manán, ita nia lider ho no sai aman ba nasaun no ba povu tomak, maibé ha’u husu mak kria estabilidade polítika no halo diálogu ho lider nasionál sira hotu, atu nune’e hamutuk bele lori nasaun ne’e ba oin,” Nia dehan bá Timor Post, iha Suku Uacala, kuarta, (20/4).
Nia hatete, povu agora ne’e hakarak hakmatek no hakarak dezenvolvimentu, tanba iha área rural povu kontinua halerik ba estrada no eletrisidade.
“Ami iha foho ne’e ami nia hakarak mak oinsá bele hakmatek, no halo dezenvolvimentu mai to’o iha area rural sira ne’e, tanba iha foho ne’e ami Halerik liu mak estrada, no barak mak seidauk asesu ba eletrisidade,” Nia deklara.
Nune’e nia lori populasaun Suku Uacala nia naran, husu ba prezidente eleitu atu servisu hamutuk ho governu hodi hadi’a estrada diresaun Postu administrativu Laga ba Baguai ne’e.
“Ami nia estrada ne’e tempu kampaña ona lider hotu-hotu mai promete atu halo estrada Laga ba Baguai ne’e, maibé to’o agora seidauk halo, ne’ebé ami kontinua husu mak ida ne’e, tanba ukun an tinan-20 ami mak kontinua sofre ba estuda ida ne’e,” Nia tenik.
Atu hakotu nia dala ida tan nia husu nafatin ba kandidatu ne’ebé de’it maka manan presiza konvense ho lider nasionál hotu-hotu hodi halo diálogu, nune’e hamutuk hodi lori dezenvolvimentu ba povu no rai ida ne’e.(Lee Notísia Seluk Iha Jornál Timor Post/Asesu You Tube Timor Post)
898 total views, 3 views today
Bele hare Video Seluk :