(Reportajen Luis Casmeiro Lopes/Editor Mateus da Cruz)
BAUKAU— Sekretáriu Autoridade Munisípiu Baukau, Simão dos Santos Marques Pinheiro, hatete, karreta estadu ne’ebé tula aqua hodi fasilita preparasaun diálogu kandidatu Lú Olo nian ne’e autoridade munisípiu maka fó aluga.
kandidatu númeru sorteiu 2, Francisco Guterres Lú Olo ho aliadu partidu Kmanek Haburas Unidade Nasionàl (KHUNTO), aliadu Partidu Libertasaun Populár (PLP) no aliadu Os Verde, ohin, hala’o kampaña ho tipu diálogu iha Centro Convenção Baucau (CCB-Sigla Portugés).
Kampaña ne’e hala’o iha tuku 10 ho balun. Durante halo preparasaun, iha karreta estadu kór mean ho Marka Hillux no xapa matríkula 06-720G-TL ne’ebé tau logo STAE apoiu tula bee aqua kaixa kuaze 20 resin iha atividade diálogu ne’e.
“Sim, ohin kareta estadu ida tula bele aqua ba kandidatura Lú Olo ninian, karreta ne’e patrimoniu munisípiu no mós salaun CCB mós patrimóniu munisípiu ne’ebé fó aluga ba ema hotu-hotu,” nia dehan, ba jornalista iha nia kna’ar fatin, Kinta (07/04).
Nia hatete, kualkér atividade saida de’it tantu partidu no sira seluk ne’ebé liga ba patrimoniu estadu, bainhira sira halo pedidu atu halo atividade iha fatin ne’e maka parte autoridade munisípiu sempre fasilita karreta ho marka karreta estadu.
“Bainhira pedidu tama hosi sese de’it ami sempre halo resibu pagamentu de alugér, maibé ho kategoria la hanesan ne’e duni ohin sira aluga 350 USD karik, aluga ba kazamentu, Wisuda, Judisium selu 300 USD no sosializasaun ho seminar selu U$ 50 loron ida,” nia dehan.
Alende ne’e parte autoridade munisípiu mós simu ona pedidu ida hosi kandidatura númeru sorteiu (2) José Manuel Ramos Horta, bainhira buat ruma falla sempre uza karreta estadu ne’e hodi tula sasán.
Tanba ne’e nia apela ba públiku katak CCB ne’e autoridade munisípiu mak jere no nakloke ba ema hotu no la taka dalan ba sesé de’it atu aluga.
Iha sikun seluk, koordenadór Organizasaun Populár Mulher Timor (OPMT), Munisípiu Baukau, Helena Martins Belo, hatete, sira halo duni komunikasaun ho parte autoridade nian hodi aluga fatin hodi fasilita diálogu kandidatu Lú Olo.
“ba salaun CCB ne’e ami aluga 350 USD, maske kareta hodi tula ne’e la’ós pakote ida maibé karik ami presiza urgente husu sira fasilita,” nia dehan.
Tanba ne’e, nia dehan, públiku bele livremente kestiona konaba pronlema ne tanba ema hot iha lei na okos.(Lee notisia seluk iha Timor Post/Asesu You Tube Timor post)
830 total views, 3 views today
Bele hare Video Seluk :