BAUKAU (Timor Post) —Xefe Suku Buibau, Francisco Ximenes preukupa tebes kondisaun estrada iha tempu udan fo ameasa ba transporte publiku. Autoridade local ne’e dehan, durante ne’e hato’o ona proposta ba ministériu kompetente maibé seidauk hetan resposta.
“Hahu ita ukun-an to’o agora seidauk rehabilita dala ida maske ami halo ona proposta dala barak mais ami nia proposta nunka aprova,” Xefe Suku Francisco ba Timor Post, Sábadu (24/7) iha Baukau Villa.
Nia haktuir, iha eis Prezidente Autoridade Munisipál, António nia tempu nia rasik halo no enkamina ba obras publiku nasional no bolu kedas nia ba promote atu ba survei maibé to’o agora seidauk ba halo survei.
Nia esplika Estrada ne’e iha tempu okupasaun Indonézia fui duni alkatraun maibé komu ukun an laiha rehabilitasaun maka alkatraun naksobu hotu ona hela de’it fatuk ruin ho rai, nune’e iha tempu bailoron transporte sira bele asesu, maibé tempu udan karreta sira ki’ik labele liu tanba suvida no fatuk namdoras.
Nia afirma, durante ukun rasik an besik tinan rua nulu ona preukupa kondisaun Estrada ne’e tanba bainhira Estrada ne’e di’ak fo asesu ba populasaun rihun resin, liu-liu populasaun suku Buibau, Samalari no Gariuai balun inklui populasaun husi suku Makalako postu admin istrativu Kelikai.
Xefe suku ne’e hatutan produtu ne’ebé mak suku Buibau iha inklui suku viziñu sira mak Hare’e, Batar, Feuk, Aifarina, Talas, Kulu, Nu’u, kami’i inklui produsaun hortikultura, floresta no selu-seluk tan, ne’ebé iha tempu udan defisil lori sai ba merkadu villa-nova Baukau tanba kondisaun Estrada.
Atual xefe suku Buibau ne’e husu ba ministériu obras publiku atu tau atensaun ba kondisaun Estrada hodi halo rehabilitasaun iha tinan rihun rua rua nulu resin ida ka tinan rihun rua rua nulu resin rua nune’e bele fasilita movimentu atividade agrikultór no mos atividade estadu no governu nian.
Hakarak informa katak estrada dirasaun area Iana-Bere to’o iha eskola ensinu bázika Bela-Vista hamutuk kilometru sanulu resin rua. (gut)
1,651 total views, 3 views today
Bele hare Video Seluk :