ATAÚRU (timorpost.com) – Partisipa iha eventu Festivál Muzíka no Kultura iha Munisípiu Ataúru, Vizitante husi Munisípiu Ainaru, Francisco Magno, hatete problema dahuluk mak bee moos.
Nia hatete, durante loron rua iha Ataúru, haree katak bee moos mak sai problema ba vizitante sira.
“Ha’u-nia observasaun durante loron rua ne’e problema ida ne’ebé ami hasoru mak bee moos, dala-ruma ita atu hariis de’it mós araska”, nia hateten ba Timor Post, iha Suku Maumeta Vila, Tersa (22/11).
Maibé, nia fó agradese ba komunidade Atauru, tanba iha ema balun laran luak ne’ebé bolu sira ba haris.
Nia hatutan, difikuldade mak bee moos hodi haris no seluk tan, kona-ba bee hemu nian, bele sosa iha kioske ka loja sira ne’ebé besik.
Alende ne’e nia dehan, kona-ba hahán no nesesidade seluk ne’e la sustar.
Maibé, nia mós salienta, hanesan Munisípiu ne’ebé foin estabelese, entaun sempre iha problema sira ne’e liuliu Infraestrutura bázika sira, hanesan bee moos, eletrisidade, estrada no seluk tan.
“Espera aban-bainrua Governu sei halo, tanba Munisípiu kuandu di’ak no furak nasaun mós furak, populasaun sira mós bele lori sira-nia produtu lokál faan iha merkadu ho fasil,” Esplika vizitante ne’e.
Nune’e atu dada vizitante husi nasaun seluk presiza hadi’a uluk Infraestrutura bázika sira, no ambiente ne’ebé moos.
Tanba ne’e, nia dehan, Festivál múzika no kultura ne’e kada Munisípiu reprezenta husi ema nain-10 ou 12, ne’ebé kompostu husi Katuas, ferik no labarik sira, no ida-idak aprezenta sira nia kultura.
“Husi Festival ne’e, ami hakarak promove mós kultura husi ne’ebá nian, ne’ebé ami mai ho kedas tais Ainaru nian, hodi futu kabun,” hateten nia.
2,030 total views, 3 views today
Bele hare Video Seluk :
Subscribe to Timorpost
