Jornalista Luis Casimiro Lopes / Editór Noémio Falcão
Ainaro (Timor Post)— Espoza Prezidente Repúblika, Cidália Nobre Guterres hasoru malu ho feto potensiál munisípiu Ainaro ne’ebé halibur aan iha Assosiasaun Feto ba Dezenvolvimentu Ainaro (AFEDENA).
Sorumutu ne’e ho objetivu rona preukupasaun liu-liu kona-ba oinsá atu suporta aktividade feto nian no konserva nafatin kultura Timor-Leste.
Durante sorumutu, Cidália husu ba AFEDENA atu hatoo proposta ba nia gabinete hodi fó apoiu liuliu kona-ba programa suku, soru no homan.
“Ami bele apoiu naran katak bele organiza halo proposta ho relatóriu kona-ba sira ninia preparasaun nune’e gabinete ninia ema sei tun mai haree hodi lansa programa refere,” Cidália subliña iha sorumutu ne’ebé hala’o iha Munisípiu Ainaro, Kinta (18/11/2021).
Cidália hatete, AFEDENA hala’o duni programa suku, soru no homan maka tuir kedas programa gabinete nian.
Durante COVID-19 maka programa Primeira Dama nian paradu, maibé atu hahú fali husi Ainaro.
“Sebele programa suku, soru no homan ne’e halao uluk husi munisipíu Ainaro tanba sira iha kbi’it atu halo,” nia dehan.
Tempu hanesan Prezidente AFEDENA, Ana Maria Pereira, sente kontente ho vizita espoza xefe estadu ba dahuluk ba AFEDENA hodi rona diretamente sira nia preokupasaun.
Tanba durante ne’e AFEDENA estabelese ona grupu haat (4) iha Postu Administrativu Maubisse, Hatu-Udu, Ainaro Villa no Postu Administrativu Ainaro.
“Grupu ne’ebé ami estabelese balun suku, soru no homan no balun halo atividades produtu ne’ebé iha kada postu administativu,” Ana hatete.
876 total views, 3 views today
Bele hare Video Seluk :
Subscribe to Timorpost
