Dili (timorpost.com) – Lider Karizmátiku, Kay Rala Xanana Gusmão, fó solidariedade ba família uma-kain 7 iha Suku Bekora, Postu Administrativu Kristu Rei, Munisípiu Dili, ne’ebé sofre desizaun husi Tribunal, ne’ebé aplika medida ho naran entrega Coisa Certa ba vítima sira.
Ho desizaun husi Tribunál sasán husi vítima sira hasai hotu mai li’ur, balun iha semitériu laran ne’ebé lokaliza besik komunidade nia rezidénsia no balun naklekar iha rai.
Xanana Gusmão ne’ebé akompaña ho preokupasaun, situasaun ne’ebé vítima sira hasoru, soe piadas ba autoridade judisiáriu.
“Labarik sira, ba estuda sai Juiz, PSIK ba atu sobu ema nia uma arbiru. Ama sira ba te’in fó han oan, sira boot sai Juiz, Prokuradór ba duni ita ki’ik sira ne’e” hateten Xanana iha fatin akontesimentu, hodi fó solidariedade ba vítima sira iha Bekora, Segunda (30/01).
Portantu rai ne’e iha tinan 1979, entrega verbalmente husi sidadaun ida ho naran Vicente Vidigal (matebian ona) ba vítima sira hodi hela no iha tinan 2013, ninia bei-oan kontesta ba Tribunal, ikus mai Tribunal deside entrega Coisa Certa ba família hitu ne’e.
Vítima sira suspeita, katak prosesu ne’ebé lori ba Tribunal hanesan lasu, tanba foti dadus baihira sira ho kondisaun lanu.
“Sira halo mediasaun, bolu katuas sira tuur iha ne’ebá, fó ABC, hola tua, katuas sira lanu hotu, sira la hatene, ko’alia to’o lori ba Tribunal, no António Sarmento, mak momentu sai advogadu iha Tribunal”, nia haktuir.
Vítima sira sente prejudikadu ho desizaun ne’e, tanba sira hela kleur ona, maibé desizaun Tribunál la favorese ba sira.
“Ami hela dezde tinan 1979 iha ne’e, iha família hitu mak iha ne’e, sira mate barak iha ne’e”, Haktuir vítima ida ne’ebé ho triste asiste medida husi Tribunál.
Okupante Rosalina Alves deklara, nia mós iha direitu atu hetan rai pedasuk ida, hodi hela nune’e bele hatutan moris.
“Ami la ba Kupang- Atambua, ita ne’e rai na’in hotu, nusa mak o na’in ami la na’in fali, ami la sai husi ne’e, ita ran fakar ba rai Timor. Ita ne’e rai na’in hotu, rai ne’e o mak halo?”, kestiona Rosalina.
Entretantu hafoin rona vítima sira-nia laran susar, Líder Nasionál Kay Rala Xanana Gusmão, to’o iha fatin no vítima sira kesar ho matan been, sira-nia susar, terus no lamentasaun kona-ba desizaun husi Tribunal.
Iha terrenu, labarik sira balun tanis hakilar, lelir “Avo, Avo no Xanana hasé kedas nonook, ha’u dehan nonook, nonook” no sidadaun ne’ebé sente vítima, hakilar Viva Xanana.
Ho Laran luak no domin ba povu, Xanana deklara no fó korajen ba vítima sira, “desizaun husi Tribunal sira sobu husi ne’e, mai oho tiha ha’u, ha’u agora hela iha ne’e, polisia oho tiha ha’u, hakoi, hakoi iha ne’e”.
Líder istóriku ne’e kestiona, kapasidade autór judisiáriu no mós Governu, hodi garante sidadaun sira-nia direitu, nu’udar na’in ba rai.
“Sira sobu uma ne’e atu halo saida, Juiz ruma ka, Prokuradór Jerál ruma mak halo nia hotel iha ne’e ka?. PLP dehan Partidu Liberta Povu, Liberta prontu, FRETILIN nia moto dehan fó naroman ba povu, imi iha mahon ne’e mak duni tiha imi para hetan naroman, ha’u hela iha ne’e, ha’u la sai husi ne’e”, Kontesta Xanana ba desizaun husi Tribunal.
Advogadu Manuel Tilman luta ba vítima sira-nia Direitu.
Parte defeza simu notifikasaun iha Sábadu no atu ezekuta Domingu, maibé adia tanba fim de semana.
Nia parte mós aprezenta Segunda-Feira ne’e (31/01) ona Rekursu ba Tribunál, hodi halo embargo, tanba autoridade sobu ona uma komunidade nian, bazeia ba desizaun husi juis, tanba ne’e prosesu ezekusaun trava, hodi hein desizaun final husi Tribunál Rekursu.
Relasiona ho prezensa Xanana Gusmão, advogadu hateten, Xanana defende Fraternidade Humana.
“Ohin hatama rekerimentu ba Tribunál tanba ne’e prosesuál. Maun boot Xanana mai to’o iha ne’e nia foti direitu humanitariu”, nia afirma.
1,647 total views, 6 views today
Bele hare Video Seluk :