DILI (timorpost.com) — Estadu ho Governu Timor-Leste tenke sériu ho kazu ba membru na’in-9 ne’ebé komete droga no José Bernardo (JB), ne’ebé hakotu is iha Sela Polisia Kaikoli.
Sekretáriu Jerál J-12 Nov.1991, Juvelino António Alves Fernandes, hatete relasiona ho kazu hirak ne’e, Jerasaun 12 De Novembru 1991, nu’udar asosiasaun ne’ebé halibur sobrevivente masakre Santa Krús nia oan sira no hamriik independente, la afilia ba partidu polítika ruma, hanesan Sosiedade Sivíl ida husu Polísia Nasionál Timor-Leste (PNTL) ho Tribunál bele fó sai prosesu hirak ne’e.
“Husu ba PNTL no Tribunál atu fó sai rezultadu kona-ba prosesu investigasaun kazu droga ba membru na’in-9, ne’ebé komete droga iha fulan hirak liubá to’o iha ne’ebé ona no rezultadu investigasaun ba kazu ami-nia membru Jerasaun 12 de Nov.1991 ho naran José Bernardo ne’ebé hakotu is iha sela Polisia Kaikoli até agora prosesu sei iha nakukun laran hela seidauk fó sai ba Públiku,” nia hateten liuhusi Konferénsia Imprensa hala’o iha Antigu Komarka Balide, Sesta (14/10).
Enkuantu ho ida ne’e, husu ba PNTL atu labele subar autór kriminozu sira ne’ebé lori farda PNTL ne’ebé harii ho eroi sira-nia raan hodi sira hatais atu halo asaun ba Joven Jerasaun foun ne’ebé mate hanesan uluk okupasaun Indonézia nian.
“Ami husu ba Na’i Prezidente Repúblika, José Ramos Horta (Avõ Ramos) no Primeiru Ministru, Taur Matan Ruak (Avõ Taur) atu bele tau atensaun ne’ebé ke sériu ba kazu sira ne’ebé ami mensiona iha leten. Atu nune’e labele lei ne’e vigor liu ba povu ki’ik no kiak sira, maibé ema ne’ebé iha poder viola lei tuir sira-nia hakarak no tuir sira nia gostu,” nia afirma.
Antes hakotu, Juvelino aumenta tan, sira hetan konfiansa husi povu hodi serbí povu no tau matan ba povu, la’o tuir lei ne’ebé vigor iha nasaun RDTL, tanba nasaun ne’e la’ós sira-nia partidu no la’ós sira-nia kompañia privadu Unipessoal Lda.
2,193 total views, 9 views today
Bele hare Video Seluk :
Subscribe to Timorpost
