DILI (timorpost.com) – Organizasaun Rezisténsia Estudantíl (RENETIL), deklara sira-nia parte kontinua apoia Servisu Nasionál Intelijénsia (SNI) no Polísia Sientífiku Investigasaun Kriminál (PSIK), atu kontinua prosesu kazu prende osan rihun 130.000 USD, iha Aeroportu Internasionál Prezidente Nicolau Lobato Komoro.
“Ami deklara apoia tomak ba entidade Polisiál no judisiária sira atu hala’o sira-nia kna’ar tuir lei haruka”, hatete Portavós RENETIL, José Neves “Samala-Rua” liuhusi Konferénsia Imprensa ne’ebé realiza iha Faról, Kinta (13/10).
Nune’e nia husu mós ba parte sira ne’ebé envolve iha kazu ne’e atu kolabora didi’ak ho autoridade Polisiál no judisiária sira.
Alende ne’e nia husu mós ba governante sira, Primeiru Ministru, Deputadu, Prezidente Repúblika no partidu polítiku sira, atu manifesta apoiu polítiku ba pesoál husi entidade sira ne’ebé halo servisu di’ak iha liña frente ba prevene no kombate krime organizadu.
Nune’e mós Veteranu, Sosiedade Sivíl, instituisaun fiar nian sira, organizasaun de massa, estudante no sidadaun tomak atu apoia mós ema di’ak sira ne’ebé servisu ho laran, ho integridade ho sentidu estadu hodi hametin fundamentu Estadu RDTL no kolabora ho dalan Pasífiku ba prevene no kombate krime organizadu sira iha Timor-Leste.
“Primeiru Ministru, Taur Matan Ruak, avalia no foti medida adekuada ba membru Governu sira ne’ebé halo interferénsia ba prosesu averiguasaun no investigasaun ba suspeitu sira ne’ebé hatudu envolvimentu iha tentativa halo transferénsia osan sai husi aeroportu ne’ebé kontra lei,” deklara nia.
Samala-Rua haktuir, hafoin kazu ne’e akontese sira kontinua akompaña nafatin deklarasaun sira iha parte hotu-hotu ho ida ne’ebé diferente, no hamosu espekulasaun oioin.
“Tanba ne’e RENETIL ohin re-afirma nia pozisaun katak, kontinua apoiu servisu Polisiál ninian hodi kontinua prosesu kazu ida ne’e tuir prosesu normál no tuir lei ne’ebé iha,” nia hakotu.
2,208 total views, 3 views today
Bele hare Video Seluk :