DILI (Timor Post) – Diretór Estabesimentu Prizionál Bekora, João Domingos, informa dadur sira ne’ebé tama iha Prizaun Bekora, iha nain-17 mak sofre moras mental.
Nia hatete, dadur nain-17, ne’ebé hetan moras mental ne’e, sira hetan tratamentu husi doutor husi Hospital Nasionál Guindo Valadares (HNGV).
“Bainhira sira hetan moras metal, ita lori ba Hospital Nasionál Guidu Valadares (HNGV), depois sira simu ai-moruk, balun sona,” dehan nia ba Media online Timor Post iha nia knaar fatin Prizaun Bekora, Sábadu (03/09).
Nia dehan, sira nain-17 ne’e, kondisaun iha agresivu, maibé sira pasiensia tebes, moras ida normal, maibé mosu moras mental ne’e derrepente de’it.
“Ita ko’alia loloos de’it, ai-moruk kona-ba moras mental ne’e, ha’u hanoin klínika hotu-hotu menus, ne’ebé kuandu ai-moruk mai tarde sira la konsumu, entaun agresivu uitoan, entaun ami lori sira fila fali ba iha Hospital Nasionál Guido Valadares, hodi halo Enjeksaun hodi sona fila fali, entaun di’ak fali,” nia dehan.
Nia hatutan, uluk ne’e sira hetan tratamentu husi doutor pisketer, maibé hafoin kovid-19 ne’e doutor ne’e la mai ona, kuaze tinan ida.
“Ami deteta mak liuhusi ami-nia asisten psikolok, ema ne’e tama ho moras mental, foti asesmentu depois haree ema ne’e moras mental duni, entaun kontinua halo tramentu ba iha HNGV,” nia afirma.
Tanba ne’e, nia hanesan Diretór Prizaun Bekora, konsege informa ba Diretór Nasionál, hakerek ona karta ba iha doutor Pisketer sira, atu kontinua halo tratamentu ba moras ida ne’e, maibé to’o agora seidauk iha resposta husi doutor Pisketer sira.
“Kuandu sira moras doutor sira iha klínika Prizaun Bekora haree lalais, depois halo guia no rekomenda ba iha HNGV para hetan tratamentu,” nia dehan.
Ikus nia dehan, dezde sira ne’ebé moras mental to’o agora seidauk iha ida mak lakon vida, tanba tratamentu la’o hela.
3,142 total views, 9 views today
Bele hare Video Seluk :