KOVALIMA (timorpost.com) – Governu liuhosi Ministériu Turizmu Komérsiu no Indústria (MTKI), husu Komunidade sira iha Suku Loro atu tau matan didi’ak ba fasilidade Sentru Soru Tais (SST), ne’ebé hari’i ona.
Ministru Turizmu Komérsiu no Indústria (MTKI), José Lucas do Carmo da Silva, hatete Governu hili suku suai loro tau sentru soru tais ne’e atu konstrui fasilidade ba komunidade ne’ebé habiban an iha kreatividade Artezenatu nian.
“Ita hotu nia eaperansa karak ita boot sira sei organiza malu di’ak liu tan no ida ne’e la’ós iha suku suai loro de’it, maibé Governu halo fasilidade ne’e ba suai oan hotu-hotu ne’ebé envolve an iha produtu Kriatividade ba tais”, nia diskursu iha serimónia refere, Sábadu (25/02/2023).
Iha serimónia ne’e Ministru hato’o parabéns ba sira ne’ebe habiban an iha soru tais.
Tanba ne’e nia husu sira jere didi’ak ba, atu nune’e hotu-hotu nia interese bele akomoda iha fasilidade ida ne’e.
Alende ne’e nia husu mós Organizasaun kiik sira tenke organiza an ho didi’ak para hola parte iha fatin ida ne’e ho nune’e Ministériu Turizmu Komérsiu no Indústria nia programa nafatin halo promosaun ba fatin ne’e.
“Ita sei lori produtus ne’e ba nivel nasionál no internasional, ita-nia tais ne’e rasik hetan rekonesimentu internasionál sai patrimóniu la’ós iha Timor de’it”, nia informa.
Tan ne’e nia hakara, hotu-hotu servisu hamutuk para produz halo barak no nia kualidade halo di’ak tanba rekonesimentu ne’e hetan ona iha UNESCO, ONU, iha ona mundu internasionál.
“Imi-nia servisu mak produs ho kualidade di’ak bo produs bebeik halo barak, ida ne’e mak Governu nia papél oinsá halo promosaun nivel internasionál no rejionál”, nia afirma.
Nia informa tan, Timor iha ona sentru merkadu sai patrimóniu iha UNESCO ne’ebá rejistu ona, no iha ne’e tenke organizadu produs barak liu no hadi’a nia kualidade.
Nia hatete, presiza servisu maka’as liu tan no Governu halo promosaun asegura merkadu no analiza produtu ba fatin ne’ebé faan.
“Labele tau tais bosan iha Sentru tanba ne’e sai kestaun ba ita husi nasionál presiza tais ruma ba iha fatin ne’e tenke atende ho kuantidade ne’ebé garante kualidade tanba rejista ho nasaun nia naran”, nia hateten.
Nia nafatin husu kualidade tais ne’e halo melloramentu nafatin ho nune’e bele garantia tais nia kualidade iha liur.
Nune’e nia husu ba autoridade lokál atu servisu hamutuk ho grupu liuliu ba komunidade iha suku loro tenke sente pertense ba iha sentidu ba programa ida ne’e, tanba Governu tau hela iha ne’e, bali ba, tau matan didi’ak ba atu nune’e bele seriu ba interese públiku.
Ikus nia husu ba juventude sira tenke sentidu pertense ba fasilidade ida ne’e, atu fatin ne’e bele mantein nafatin di’ak no halo produsaun barak liu tan bele atende iha nivel Munisípiu.
2,881 total views, 12 views today
Bele hare Video Seluk :