DILI (timorpost.com) – Mate Isin Riando Falo ho Orlando Martins to’o ona iha fronteira Sakato, suku Nipani, postu administrativu Pante Makasar, Rejiaun Administrativa Espesiál Oekusi Ambeno (RAEOA), família simu ho matabeen.
Mate isin joven na’in rua foin mak to’o iha fronteira Sakato, iha oras tuku 14:00 OTL, hodi haloot iha rai moris fatin tuir kultura Oekusi nian.
Iha loron Sábadu (18/02) dadersan besik tuku 09:00 OTL, karreta funeral tula ona mate isin Riando Falo ho Orlando Martins, lori ba iha RAEOA liuhosi fronteira terrestre nian hodi ba haloot iha Oekusi.
Antonio Falo nu’udar aman hosi matebian Riando Falo, hatete nia parte sente no hatene katak, nia oan (Riando Falo) halerik hela hodi bolu nia aman atu salva lalais nia.
Antonia haktuir iha ninia posting akun facebook katak, “O nia matan hateke ba dalan ho esperansa hein ha’u nia prezensa atu tulun lalais hosi susar no terus ne’ebé kona O”.
“Ha’u sente no hatene katak O halerik hodi bolu ha’u O nia aman atu lolo-liman lalais atu salva O”, Antonio Falo hateten iha ninia facebook, Sesta (17/02).
Enkuantu, Komandante Polisia Nasionál Timor-Leste (PNTL) Munisípiu Ainaru, Superintendente Polisia Paulino Carmo, hateten klaru emjeral matebian primeiru hetan iha loron 14/02, no ida segundu hetan iha loron 16/02 horisehik, enkuantu na’in-rua ne’e transporta ona mai iha mortuariu Hospital Nasionál Guido Valadares Dili (HNGV), hodi halo prosesu autópsia.
“Kona-ba prosesu investigasaun, agora daudaun ita nia investigasaun komandu PNTL munisípiu Ainaru, liuhusi nia seksaun investigasaun halo hela ona prosesu investigasaun, komesa buka ona dadus, komesa buka tuir ona kolega sesé maka sira la’o hamutuk,” informa Paulino ba Jornalista sira hafoin remata sosializasaun ba Membru PNTL sira iha Sentru Formasaun Polisia (SFP), Akademia Comoro Dili, Sesta (17/02).
Nia hatete, tanba iha momentu akontesimentu ne’e, seguransa iha fatin ne’ebá hatete katak, sira nia motor iha ne’ebá, maibé na’in ba motor mak laiha, tanba ne’e, dala ida tan agora daudaun PNTL investigasaun Munisípiu Ainaru halo hela ona investigasaun, para maizumenus verdade akontesimentu ne’e oinsá.
“Ita halo prosesu autópsia ba matebian Riando Falo hotu ona no ohin tuku 2:00 lokraik maka sei halo autópsia, ida seluk agora daudauk iha ona família nia liman, hodi hein nia kolega ne’ebé maka orsida (horisehik) loraik halo autópsia, depois lori intrega ba iha família matebian, depois sira na’in-rua sei lori ba sira knua Oekusi hotu,” nia konta.
Komandante ne’e hatete, kona ba sinais ruma husi matebian nia isin, ne’e sertifikasaun sei sai husi parte médiku sira, provizóriu la bele hatete la iha sinais ruma iha nia isin, tanba ema ida labele siik de’it, maibé tenke siik husi autópsia ka sertifikasaun médiku nian. Tanba ne’e prosesu autópsia kontinua la’o no mós prosesu ba investigasaun mós kontinua la’o.
“Sim investigasaun relasiona ho sira nia mate iha aredor Nain Feto Ramelau ne’e, mós la’o no mós prosesu autópsia mós la’o,” nia informa.
Iha fatin hanesan, Komandante Jerál PNTL, komisáriu Polisia Faustino da Costa, hateten ligadu ho joven na’in-rua ne’ebé mak mate iha Foho Ramelau ne’e, hetan ona tanba ne’e hein prosesu autópsia husi HNGV.
“Ha’u hakarak atu dehan matebian na’in-rua hetan ona, ida hetan horisehik iha dia 16, ida fali autópsia la’o tiha ona, mais rezultadu doutór sira mak hatene, maibé prosesu investigasaun ba ida ne’e ita la’o hela,” nia dehan.
Nia dehan, prosesu investigasaun ne’e, liuliu kona-ba sira nia fatin ne’ebé foti ne’e no mós farda ka ropa sira ne’e, hanoin buat bain-bain, tanba ne’e prosesu la’o hela, no komandu PNTL munisípiu Ainaru mós hetan apoiu servisu husi Departamentu Investigasaun Kriminál Nasionál, Komandu Munisípiu Ainaru, no ekipa seluk tan.
“Ha’u hanoin prosesu ne’e la’o ba maka haree, tanba ida ne’e mak komandu PNTL, orienta ba komandu PNTL Munisípiu Ainaru, normalmente ezijénsia públiku ne’e hakarak tau polisia iha ne’ebá, mais iha diresaun própriu ba iha ida ne’e mós iha, ne’ebé ko’alia kona-ba patrimóniu estadu, nune’e mós ba autoridade munisipál oinsá atu tau seguransa iha ne’ebá.
Nune’e mós, nia dehan, komandu haree antesipa ba oin, tanba orgánika foun termina mós kona bá seksaun ida naran Turizmu, entaun saida maka atu halo, tanba ne’e presiza identifika atu nune’e haree ba kestaun ne’e.
1,582 total views, 3 views today
Bele hare Video Seluk :
Subscribe to Timorpost
