Dili (timorpost.com) – Iha semana kotuk Parlamentu Nasionál, hili Virgílio Guterres da Silva, hodi lidera Instituisaun Provedoria Direitu Umanu no Justisa (PDHJ), ba períodu 2023-2027, tanba ne’e ohin nia rezigna-an husi kargu Prezidente Konsellu Imprensa.
“Hanesan ita hotu hatene katak iha semana kotuk Parlamentu Nasionál hili Prezidente KI ba Provedór Direitu Umanu ba períodu 2023-2027 nian. Iha kritériu sira ne’ebé KI presiza prenxe mak tenke rezigna an husi kompetente sira seluk no Estadu nian bainhira atu ba assume kargu provedór Direitu Umanu no Justisa, ne’ebé sei toma pose iha loron 15 Fulan Janeiru tinan 2023”, hateten Diretór Ezekutivu KI, Rigoberto Monteiro, iha Salaun Konferénsia KI, Tersa (20/12).
Iha fatin hanesan Prezidente Sesante Konsellu Imprensa (KI), Virgílio Guterres da Silva, hatete ba apoiu tomak ne’ebé nia hetan, nia fiar katak durante hala’o knaar iha fatin ida ne’e, mandatu rua, ida maka kompletu no segundu nian ne’ebé to’o klaran de’it, maibé apresia apoiu tomak ne’ebé mai.
“Iha biban ida ne’e, hato’o apresiasaun ba públiku, Jornalista no media na’in-sira nia apoiu, ne’ebé durante ne’e fó mai iha KI liuliu fó apoiu ba ha’u pesoalmente atu hala’o knaar nu’udar Prezidente KI. Karik iha sala ruma ka fallansu ruma ne’ebé durante ne’e halo, iha biban ida ne’e hakarak husu deskulpa”, nia hateten.
Nia dehan, ida ne’e la’ós despedida, maibé tanba fatin iha ne’e, Provedoria Direitus Umanu nia ámbitu mak luan liu KI, tanba KI ko’alia kona-ba Liberdade imprensa no espresaun, iha provedoria entaun fahe malu, maibé sira kontinua servisu hamutuk mezmu iha ambiente ne’ebé lahanesan.
“KI ba oin tenke koopera makas atu oinsá Sidadaun Timoroan no ida-idak hatene no uza Komunikasaun Sosiál hanesan uza media, Rádiu, Televizaun no mós meiu ida atu hato’o sira-nia aspirasaun no oinsá atu uza meius ne’e defende sira-nia direitu Umanu no Profisionál no direitu sira seluk ne’ebé KI prevee. No ha’u hato’o ha’u-nia apresiasaun profunda ba Parlamentu Nasionál ne’ebé eleze ha’u ba kargu Provedór. No mós ba Partidu polítiku sira fó apoiu polítika liu iha votasaun”, nia hateten.
Iha sorin seluk, Prezidente Interinu Konsellu Imprensa, Francisco Belo Simões da Costa, hatete husi nia parte agradese ba Prezidente Sesante KI, Virgílio no Membru Konsellu sira hotu ne’ebé fó fiar ba nia hodi Interinumente assume kargu Prezidente KI durante loron 9o nia laran, nune’e ba sira sei halo Komunikasaun ho Asosiasaun Jornalista Timor-Leste hodi halo Konferénsia ida nomea fali membru ida ba Prezidente KI.
“Iha biban ida ne’e ha’u hakarak agradese ba kontribuisaun husi Prezidente KI Sesante, Virgílio Guterres, ne’ebé hahú Mandatu períodu 2016 mai to’o ohin loron kontribui makas no ativu tebes ba harii instituisaun ida hanesan Konsellu Imprensa, hahú buat ida laiha, ohin loron KI iha buat ruma no iha naran iha Nasaun ida ne’e”, nia tenik.
2,715 total views, 3 views today
Bele hare Video Seluk :