ADVERTISEMENT

José Nia Obiediensia Ho Maria Nia Haraik-An, Loke Dalan Ba Jesus Nia Mai “Emmanuel katak Maromak ho ita”

Timor Post - Jeral · Relijiaun
  • Share

(Reflexaun badak ba Domingo Advento IV nian. Is. 7, 10-14; Sal. 23(24); Rom. 1, 1-7; Mt. 1, 18-24)

Husi: Luis Pereira S,J

ADVERTISEMENT
SCROLL FILA BA NOTISIA


Kontexto!

Ita tama ona ba Domingo Advento IV katak domingo ikus liu nian. Ita mós sunu lilin dahát nian. Ita nota katak lilin sira nia naroman sai forte liu tan. Ita besik ona ba naromak bót Natal nian. Nuné, liturjia aprezenta mai ita figura importante rua iha plano salvasaun Naí Maromak nian ba humanidade: José no Maria virgem.

Evanjelista Saun Mateus haktuir katak sira nain rua hakotu ona lia atu moris hamutuk. Tuir ita nia kontexto, ita bele dehan prenda ona. Maibé, molok sira moris hamutuk, Maria kous ona. Ida ne’e, problema bót ba José. Tamba ne’e, nia hakarak husik Maria nonok deít. Maibé, Maromak konvence nia liu husi ninia mehi atu simu projeto salvasaun Maromak nian. José, ikus mai simu no proteje Maria. Saída lós mak halo José no Maria sai ema/figuras especiais iha Maromak futar oin? Pontos 3 bele aprende, medita no reflete hamutuk:

  1. José: Justo, obidiente no Serbisu nain!

Saun José mak figura ida ne’ebé kuaze lian laiha/lian-laek iha Bíblia. Nia nonok deít. Maibé, ema serbisu nain ho valores humano ne’ebé forte iha nia-an. Nia, husik nia plano atu soe Maria nonok deít no hakoak Maromak nia plano ba nia liu husi anjo iha nia mehi dehan: “José, David Nia oan, keta tauk simu ó nia noiva Maria, basá, nia kous hodi Espírito Santo nia kbít”. José, rona no simu ida ne’e. Atitude rona no simu ida ne’e, lori ita ba kumprende José hanesan ema justo ida. Nia justo tamba nia iha hanoin ne’ebé lós ho asaun ne’ebé lós mós konaba nia noiva: husik nonok deít. Maibé, nia muda ninia plano-decizaun, tamba deít Naí Maromak ninia plano. Tamba ne’e, mak ita mós dehan nia ema obidente ida. Obidece ba Maromak no ninia plano. Nuné, nia simu kedas Maria no Kosok Oan. Sira ba kedas fatin seguro. Hahu husi ne’e, José asume ona knár protektor ba Maria no Kosok Oan Jesus. José mós mak badaen ai nian ida. Nia ema serbisu nain ida. Nia moris tomak mak iha silensio nia laran, serbisu makás tau matan ba nia família ne’ebé Naí Maromak konfia ba nia. Ho certeza, ita bele dehan katak nia eduka Jesus hanesan aman ida.  Aman  sira bele banati tuir José. Aprende atu proteje, eduka no serbisu makás ba imi nia família. Aprende mós sai ema justo no obidente hodi lao tuir plano Maromak nian. Keta dók husik Maromak. Lori imi nia família besik ba Nia. Imi sei sai ema rahun diak no hetan bensaun wain.

  1. Maria: Rona, Medita no Fo Fuan ba Lia-Fuan!
Lee Mós :
PD Rekoñese Dezenvolvimentu TL Hakdasak

Buat sa mak halo Maria sai núdar feto rahun diak ida no sai Naí nia Inan? Nia ho haraik an, rona Maromak nia Lia-Fuan, medita Lia-Fuan ne’e no fo fuan ba Lia-Fuan refere. Nia rona Nai Maromak nia Lia-Fuan liu husi anjo Gabriel ne’ebé ba fo hatene ba nia katak nia atu sai Inan ba Maromak Oan ne’ebé atu mai moris iha mundo. Maria rona proposta ne’e, medita no responde ho nia SIM, maski ho tauk no la komprende ida. Maria nia ‘sim’ mak loke dalan salvasaun nian mai ita hotu.

Lee Mós :
SEA apela a investimento da Pelican Paradise no ambiente

Maria konfia iha Nai Maromak ho nia moris tomak. Nuné mak Nai Maromak rasik mós konfia nia Oan Mane Mesak ba Maria. Naí Maromak kapacita, nutre, tulun no akompanha Maria iha nia misaun. Tan ne’e, mak nia sai núdar feto haraik an no rahun diak ida.

  1. Emmanuel: Maromak ho ita!

Profeta Isaias iha leitura dahuluk no Saun Mateus iha evanjelho haktuir konaba Jesus mak Emmanuel katak Maromak ho ita. Lós, Jesus nia prezensa hatudu katak Maromak horik ho ita. Maromak hola isin ema nian atu bele tama iha ema nia historia hodi bele soi ema. Ho Jesus, ita haré no moris hamutuk ona ho Maromak. Tambá ne’e, ita preciza aprende no kaer metin valores José no Maria nian, atu Emmanuel sai realidade ida ba ita iha tempo sira ikus advento nian no natal ne’e.

Lee Mós :
Ró Kruzéiru husi Indonézia Atraka iha Portu Dili Antes ba Austrália

Ita habadak lia hodi dehan katak Domingo Advento ida ne’e, konvida ita atu ita nia matan rua fihir metin ba no iha José no Maria hodi haklean ita nia Fiar, Esperansa no domin atu nuné, ita bele hananu ho salmista “Naí hit-An mai ba: Nia ne’e liurai bót”. Amen!(lupersj) •(Hakerek nain Jesuita, hela iha Monserrat-Kasait, Liquiçá no Full-time lecturer iha Instituto São João de Brito (ISJB), Kasait-Liquiçá!)

 2,368 total views,  3 views today

Oinsa Ita nia Reaksaun iha Notisia Nee?
Like
Love
Haha
Wow
Sad
Angry
You have reacted on “José Nia Obiediensia Ho Maria Nia Haraik-An, L…” A few seconds ago

Bele hare Video Seluk :
  • Share
ADVERTISEMENT
SCROLL FILA BA NOTISIA

Notisia Timorpost Seluk


Komentariu :
Timorpost.com. Respeita tebes Ita Nia opiniaun. Laran luak no uza etika bainhira hatoo opiniaun. Opiniaun iha Ita Nia responsabilidsde, tuir lei ITE.

Varanda
Kategoria
Video
Buka
Watch
Facebook
error:
Simu Notifikasaun Hosi Timor Post Online! OK No