DILI (timorpost.com) – Ekipa Inspesaun hosi Ministériu Turizmu, Komérsiu no Indústria (MTKI), hapara ona Jogu Ilísitu iha Delta 4.
Portavós Komandu Jerál PNTL, Superintendente Xefe Arnaldo de Araújo, informa, iha loron 21 fulan Novembru tinan 2022, iha oras 17:30, Ekipa Inspesaun Jerál Ministériu Turizmu, Komérsiu no Indústria (MTKI), halo inspesaun ba Jogu Toto Bola online iha area Delta 4, Postu Administrativu Dom Aleixu, Munisípiu Dili, konsege deteta kompañia Fanspot Unipesoal, Lda. Halo atividade Jogu Toto Bola sein iha lisensa.
“Ita-nia ekipa halo inspesaun ba kompañia Fanspot, Lda, konsege deskobre sira halo atividade Jogu Toto Bola online sei lisensa, nune’e sira kompañia refere loke atividade iha area Delta 4 mós la husu lisensa husi ita-nia Inspesaun Jogu,” nia hateten iha Komandu Jerál PNTL, Kaikoli, Kuarta (23/11).
Nia dehan, ekipa Inspesaun MTKI, entrega ona kazu Jogu ilísitu ne’e ba iha Departamentu Servisu Investigasaun Kriminál Nasionál (SIKN), tanba atividade jogu ilegál ne’e, hanesan auto krime iha artigu 322 iha kódigu penal.
Alende ne’e nia dehan, parte husi Ekipa Inspesaun Jerál Jogu mós entrega objetu prendidu hanesan, Komputadór, TV eskraem no sasán seluk-seluk tan.
“Ita-nia Ekipa investigasaun kriminál no inspesaun jerál jogu identifika autór na’in-lima, ne’ebé sai autór prinsipál ba atividade esplorasaun jogu ilegál Toto Bola iha Delta 4, tanba ne’e ita-nia investigadór aplika detesaun tanba flagrante de lito, hodi aprezenta ba primeiru interrogatóriu,” nia hateten.
Nia dehan, Sidadaun sira ne’e, agora iha hela sela detensaun Komandu PNTL Munisípiu Dili, hodi detein 72 oras, hafoin haruka ba iha primeiru interrogatóriu ba iha Tribunal Distritál Dili (TDD).
Enkuantu, autór prinsipál ba jogu ilísitu ne’e, ho naran inisiál JGLJ, idade 53 sidadaun Xina, AL idade 50 sidadaun Xina, DI idade 45 sidadaun Indonesia, AF idade 31 sidadaun Timor-Leste.
1,395 total views, 6 views today
Bele hare Video Seluk :